Ministru Petróleu no Minerál, Víctor da Conceição Soares. Imajen Tatoli/Egas Cristovão

DILI, 28 outubru 2020 (TATOLI)–Kompañia Timor Resources Pty.Ltd, hosi Austrália hato’o ona karta ba Ministériu  Petróleu no Minerál (MPM) no Autoridade Nasionál Petróleu no Minerál (ANPM) hodi halo perfurasaun mina-matan iha Kosta Súl, iha marsu 2021.

“Planu ne’e tuir loloos outubru foin lalais ne’e  halo ona perfurasaun, maibé tanba COVID-19 mak sira husu halo estensaun tan ba trimester dahuluk 2021, ne’ebé sei monu iha marsu mak halo perfurasaun,” Ministru Petróleu no Minerál, Víctor da Conceição Soares informa ba Agéncia TATOLI iha Palásiu Governu, kuarta ne’e.

Tuir Ministru, ANPM no halo ona verfikasaun katak empreza australiana ne’e halo mobilizasaun ona iha terenu maibé tanba pandemia globál afeta ba planu perfurasaun.

“Ita haree kompañia ne’e preparadu ona no hein sira-nia tékniku to’o iha inísiu tinan 2021 maka bele hahú halo perfuransaun, maibé daudaun mkina sira iha ona Suai,” nia akresenta.

Maski, situasaun surtu COVID-19 iha Timor Leste, maibé Timor Resources nafatin hatudu kompromisu halo perfurasaun mina-matan lima iharai-maran iha Kosta Súl, área Suai no Manufahi.

Diretór Operasaun Kompañia Timor Resources, Luís Pereira, dehan empreza nafatin iha kompromisu no prontu atu halo perfurasaun mina-matan maibé ho situasaun pademia globál afeta oituan, tanba ne’e sei adia loron instalasaun no perfurasaun.

Nia haktuir, daudaun ne’e empreza australiana ne’e monta hela ekipa seguransa no manutesaun iha terrenu atu kontinua hein mákina sira ne’e to’o inklui enjeñeiru sira hosi Indonézia, Amérika, Nova Zelándia no Austrália atu hahú hala’o atividade.

Tuir planu, Empreza australiana ne’e hakarak foku uluk ba posu hanaran Karau, ne’ebé lokaliza iha suku Matai, postu administrativu Maucatar, munisípiu Covalima, hafoin mak muda fali ba posu daruak lokaliza iha aldeia Sanfuc, suku Camenaça, postu administrativu Suai Villa, munisípiu Covalima.

Entretantu, Parte autoridade kontinua akompaña nafatin atividade kompañia sira iha terrenu tanba antes halo perfurasaun iha ona peskiza jeofízika ho sistema sízmiku no magnétiku ne’ebé ekonomikamenteno téknikamente viável atu halo perfurasaun.

Kompañia Timor Resources halo perfurasaun ba mina-matan iha rai-maran área Betano no Manufahi iha bloku lima.

Atividade iha bloku hirak ne’e hahú ona iha tinan-2017, ho peskiza jeolójiku no estudu sira seluk no iha outubru 2018 hala’o ona teste sízmiku sira iha Bloku A.

Empreza uza ona sistema vibroseis, ne’ebé hanesan alternativu ida kontroladu hosi teste sízmiku sira.

Sistema hanesan alternativu ida kontroladu hosi teste sízmiku, enkuantu bloku C hala’o ona teste sira iha outubru iha zona Betano (entre Alas ho Hatudu) no halo teste vibroseis.

Planu atuál haree ba perfurasaun tolu to’o lima iha bloku A no ida-idak hosi perfurasaun tolu iha shallow- field to’o metru 2.000 no ho kustu millaun $35.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here