Prezidente Repúblika, Francisco Guterres "Lú-Olo". Imajen Tatoli/ Egas Cristovao

DILI, 28 outubru 2020 (TATOLI) — Prezidente Repúblika (PR), Francisco Guterres “Lú-Olo”, iha  loron 27 outubru 2020, dekreta tan Estadu emerjénsia dahituk ba loron tolu-nulu (30),  hahú hosi tuku 00.00 iha loron 4 novembru 2020 no termina iha tuku 23.59 iha  loron 3 dezembru, tinan ne’e.

Notísia Relevante : Prezidente Repúblika dekreta ona estadu emerjénsia daneen

Nota komunikadu hosi Prezidénsia Repúblika, ohin, relata katak deklarasaun Estadu emerjénsia sei abranje territóriu nasionál tomak.

Estadu emerjénsia sei parsialmente suspende direitu ba sirkulasaun internasionál, liberdade sirkulasaun no fixasaun rezidénsia ba kualkér pontu iha territóriu nasionál no direitu ba rezisténsia.

Autoridade públika kompetente sira sei impoin restrisaun nesesária ba redusaun risku hada’et nian no ezekuta medida prevensaun no kombate epidemia, hanesan distansiamentu sosiál, kuarentena ba suspeitu infesaun, izolamentu ba moras no suspeitu, konfinamentu domisiliáriu, uzu obrigatóriu máskara, fase-liman no distánsia fízika.

Prezidente Repúblika dekreta Estadu emerjénsia hafoin Parlamentu Nasionál,  iha loron 27 outubru, fó autorizasaun ba renovasaun.

Membru Konsellu Superiór Defeza no Seguransa no Konsellu Estadu, iha loron 26 outubru, rekomenda ba Prezidente Repúblika atu hato’o mensajen ba Parlamentu Nasionál husu autorizasaun ba renovasaun Estadu emerjénsia tuir pedidu hosi Governu.

Membru Konsellu Superiór Defeza no Seguransa no Konsellu Estadu hato’o opiniaun katak, dalan di’ak liu kombate Coronavirus ka COVID-19 mak prevensaun tanba haree ba kapasidade país nian atu hatán ba propagasaun COVID-19.

Pedidu Governu ba estensaun Estadu emerjénsia ninian tanba haree ba evolusaun preokupante ba situasaun epidemiolojia no proliferasaun kazu rejistadu ho COVID-19 ne’ebé aumenta iha nivel rejionál no nivel mundiál.

Dezde marsu, tinan ne’e, COVID-19 nu’udár moras importadu, Timor-Leste implementa kedas Estadu emerjénsia bainhira rejista kazu pozitivu ida.

Implementasaun Estadu emerjénsia nu’udár medida preventiva no kontrolu COVID-19 atu hases sidadaun hotu-hotu hosi kalamidade públika.

Ohin-loron Timor-Leste rejista kazu pozitivu na’in-ida no dezde marsu 2020 to’o ohin-loron, ema na’in-29 rekuperadu no laiha ema ida mak mate.

 Jornalista   : Cipriano Colo

Editór        : Francisco Simões

HAKEREK NO HATÁN

Please enter your comment!
Please enter your name here