DILI, 28 outubru 2020 (TATOLI)-Ministériu Públiku (MP) liuhosi Prokuradora titular Ivonia Guterres, husu ba Tribunál Distritál Dili (TDD) atu aplika pena prizaun tinan-tolu no suspende ba tinan-tolu ba arguida na’in-tolu ho inisiál MD, JDG, MN ne’ebé ho pasaporte Filipina tanba iha produsaun prova faktu sira provadu komete krime ultraje ba símbolu nasionál ne’ebé previstu iha artigu 206 no reforsa ho artigu 30 iha kódigu penál.
Notísia Relevante : PNTL sei prosesa sidadaun Filipina na’in-tolu tuir lei
Tuir faktu ne’ebé arrola hosi Ministériu Públiku (MP) katak, kazu ne’e akontese iha domingu (25/10), komunidade no Konsellu Polisiamentu Komunitária (KPK) hetan arguida sira treinu hela karreta uza bandeira RDTL ki’ik (banderola) ne’ebé tidin iha rai ka markasaun hanesan hodi rezulta karreta ba-mai sama kona bandeira RDTL ne’e.
Akontesimentu ne’e iha área Tasi-Tolu, Aldeia 12 Outubru, Suku Comoro, Postu Administrativu Don Aleixo, Munisípiu Dili, bainhira arguida sira treinu hela karreta.
Arguida sira kumpre ona detensaun durante oras 72 no submete ba julgamentu primeiru interrogatóriu no ohin, kontinua ba iha prosesu sumáriu.
Hatán ba faktu sira-ne’e arguida na’in-tolu, deklara ho parsiál ba Tribunál katak faktu sira-ne’e loos hotu no sira husu deskulpa ba Estadu RDTL.
Arguida sira mós arrepende ho hahalok sir- ne’e no promete iha futuru sei la komete tan aktu hanesan.
Hafoin rona tiha deklarasaun parte sira tama kedas ba iha alegasaun parte MP liuhosi Prokuradora Ivonia Guterres, hateten, produsaun prova faktu sira konfesa loos hotu tanba ne’e MP mantén nia akuzasaun ba krime ne’ebé imputa nune’e husu Tribunál atu aplika pena prizaun tinan-tolu no suspende ba tinan-tolu.
Advogadu privadu, Ruben Carvalho Perreira, ne’ebé fó asisténsia ba arguida sira husu Tribunál atu aplika de’it pena admoestrasaun (hukuman peringatan) tanba haree ba sirkunstánsia rekizitu krime no durante julgamentu arguida sira konfesa la nega faktu no arrepende tebes ba sira-nia hahalok.
Juiza singular, Maria Solana ne’ebé prezide julgamentu ne’e deside adia fila-fali julgamentu ne’e bai ha loron 03 novembru, tinan ne’e, iha tuku 16:30 Otl, hodi rona leitura finál.
Jornalista : Nelson de Sousa
Editór : Francisco Simões
