Diretór Nasionál Aprovizionamentu, Quintiliano A. Belo. Imajen/MOP

DILI, 28 outubru 2020 (TATOLI)–Ministériu Obra Públika (MOP) liuhosi Diresaun Nasionál Aprovizionamentu (DNA), iha tinan ne’e nia laran hahú halo aprovizionamentu antesipada ba projetu tinan 2021.

“Diresaun Nasionál Aprovizionamentu hahú halo aprovizionamentu antesipada tuir orientasaun Ministru atu aselera prosesu ezekusaun no dezenvolvimentu nasionál liuhosi investimentu setór públiku nian, hahú iha 2021 ba oin,” Diretór Nasionál Aprovizionamentu MOP, Quintiliano A. Belo informa ba Agência TATOLI iha ninia knaar fatin, Caicoli, kuarta ne’e.

Inisiativa ne’e tanba esperiénsia hatudu ezekusaun Orsamentu Jerál Estadu (OJE) dala barak la’o tarde tanba prosesu administrasaun sira. 

“Ita haree kontratu ho empreza sira loloos finaliza iha tinan-ida nia laran, maibé realidade kontratu sira carry over ou halo reapropriasaun hodi hatodan orsamentu tinan tuir mai. Signifika Estadu sei la autoriza instituisaun sira atu halo buat foun bainhira buat tuan rasik laiha progresu,” nia esplika.

Tuir Dirijente ne’e, situasaun hirak ne’e akontese tanba prosesu aprovizionamentu lori tempu naruk tuir kada modalidade, mínimu hahú fulan-ida to’o neen ba prosesu selesaun, tanba ne’e Ministru Obra Públika, Salvador Eugênio Soares dos Reis orienta diresaun responsável atu hahú prosesu aprovizionamentu, nune’e dezempeñu ezekusaun sai di’ak liután.

“Ami halo aprovizionamentu antesipada ba obra ne’ebé ho kategoria hanesan manutensaun alokadu iha kategoria bens no servisu, atubele hahú  no promove projetu planeadu sira, nune’e bele atinje meta tinan-lima ne’ebé mak aprovadu iha Parlamentu Nasionál,” nia subliña.

Diretór ne’e rekoñese, maski OJE 2021 seidauk hahú diskusaun maibé ho prosesu antesipada ne’e bele fasilita prosesu ne’ebé tuir lei hateten no aselera liután prosesu ezekusaun molok OJE 2021 kaduka. 

“Loos duni, orsamentu  seidauk hetan aprovasaun iha Parlamentu Nasionál no promulgasaun hosi Presidente Repúblika, maibé Lei Aprovizionamentu ne’ebé Timor-Leste komunga la taka dalan atu hahú iniasitiva ida, ne’ebé bele kumpre nafatin Lei Jestasaun Finanseira, nune’e bainhira pronúnsia ou selebra kontratu ruma tenke iha kabementu orsamentu,” nia akresenta. 

Obra ne’ebé alokadu iha kategoria kapitál dezenvolvimentu, MOP-DNA obrigadu tenke submete dokumentu sira hodi hetan verifikasaun prévia hosi Ajénsia Dezenvolvimentu Nasionál (ADN) tuir kompenténsia ne’ebé lei hateten molok loke konkursu públiku.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here