Logotipu MEJD

DILI,28 outubru 2020 (TATOLI)—Governu liuhosi Ministériu Edukasaun Juventude no Desportu (MEJD), iha kuarta ne’e, oferese ona prémiu ba profesór na’in neen ne’ebé priénse kritéria nu’udar mellor professor di’ak liu tanba durante ne’e hanorin ona iha eskola ensinu pre-eskolár, to’o tékniku vokasionál iha Timor-Leste.

Mellor profesór na’in neen ne’e maka Paulo dias Menezes, Maria Rodis Ug, Mariano Moniz Bere Loko, Vicente Marçal da Silva no Celestina Terezinha Freitas.

Diretór Jerál Ensinu Pre-Eskolár, Ensinu Báziku no Rekorente, Apolinário Serpa Rosa, informa  manorin na’in hirak ne’e iha tinan 2017 tuir ona konkursu ne’e no MEJD hili sira maka sai mellor profesór hodi simu ona sertifikadu tanba priénse duni kritéria ne’ebé maka Ministériu Edukasaun estabelese ona.

Kritéria atu sai mellor profesór ne’e maka tenki sidadaun Timoroan, ida mínimu tinan 30, durasaun hanorin mínimu tinan 10, koñesimentu ba kuadru kompoténsia,tékniku pedagójika, sientífiku, domina lían ofisiál tetun no portugés, tékniku profesionál no étika profesionál.

“Husi kriteria sira ne’e kuaze ita-nia manorin hamutuk na’in 36 mak kompete maibé sira na’in 6 de’it mak liu tanba haree ba rekezitu ne’ebé sira na’in 6 priénse hotu kedan,” nia relata ba jornalista sira iha salaun Ian Martin INFORDEPE, Matadouro kuarta ne’e.

Prémiu ne’ebé maka MEJD distribui ona ba sira iha kuarta ne’e maka osan ho valór $200 no sertifikadu rekoñesimentu.

Iha fatin hanesan mellor profesór husi Ensinu Sekundária N0.1 Baucau Paulo dias Menezes, hateten nia komesa kareira ne’e iha tinan 1979 hahú hala’o kna’ar ne’e hodi hanorin adultu sira iha ai-laran to’o ohin loron.

“Ha’u iha ai-laran simu reponsabilidade hodi hanorin analfabetu no adultu sira. Maibé tanba mós desizaun Komité Sentrál FRETILIN (CCF-sigla portugés) nian haruka nia tun fali mai vila hodi kontinua ba Indonézia maibé tenki nafatin ejiste nu’udar ema ne’ebé hakarak ukun rasik an,” nia esplika.

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here