Prezidente Komisaun C (Finansa Públika), Deputada Maria Angélica Rangel. Imajen/Egas Cristovao.

DILI, 28 outubru 2020 (TATOLI)—Komisaun C (Finansa Públika) aprova kalendarizasaun debate proposta-lei Orsamentu Jerál Estadu (OJE) 2021 ho unanimidade.

“Komisaun aprova ona kalendáriu hahú hosi semináriu panorama orsamentál, audiénsia públiku, debate jeneralidade no espesialidade, kalendáriu ne’e ohin aprova ami ho unaminidade,” Prezidente Komisaun C, Deputada Maria Angélica Rangel, informa ba jornalista sira iha resintu Parlamentu Nasionál, kuarta ne’e.

Nia hatutan, proposta-lei OJE 2021 ne’e Governu husu karáter normál entaun hahú hosi semináriu panorama orsamentál to’o finál globál durante fulan ida tomak.

“Ami sei komesa ho panorama orsamentál iha loron 4 no 5 novembru 2020 iha Hotel Novo Turismu, nune’e hahú hosi loron 6 novembru sei halo audiénsia públiku no debate jeneraliadade sei hahú iha loron 01 dezembru no termina iha loron 21 dezembru 2020, loron 22 dezembru Komisaun C sei halo redasaun finál hodi sumbete ba Prezidente Repúblika,” nia dehan.

Prezidente Parlamentu Nasionál, Deputadu Aniceto Longuinhos Guterres Lopes, horisehik, fó-sai liuhosi plenária katak dokumentasaun proposta-lei OJE 2021 sei to’o iha PN iha loron 29 outubru.

Iha loron 15 outubru 2020, Governu liuhosi Ministériu Finansa (MF) aprezenta ona proposta-lei Orsamentu Jerál Estadu (OJE) 2021 ho montante biliaun $1.895 ba Parlamentu Nasionál (PN).

Proposta OJE 2021 hamutuk biliaun $1.895 komposta hosi saláriu no vensimentu millaun $ 239,26, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here