Telekomunikasaun uza fibra óptika. Imajen/Espesiál

DILI, 28 outubru 2020 (TATOLI)–Vise Primeiru-Ministru no Ministru Planu no Ordenamentu, José Maria dos Reis no grupu traballu interministeriál halo aprezentasaun ida ba Konsellu Ministru (KM) kona-ba opsaun téknika ba implementasaun projetu fibra óptika.

Ministru Prezidénsia Konsellu Ministru, Fidelis Manuel Leite Magalhães, hateten grupu traballu ne’e funsiona ho dependénsia ba komisaun interministeriál no responsável liuhosi koordena prosesu planeamentu no implementasaun kabu submarinu.

“Grupu ne’e aprezenta opsaun téknika ne’ebé iha no kritériu kona-ba avaliasaun no negosiasaun, planu implementasaun ba infraestrutra rede banda larga iha Timór laran tomak no opsaun polítiku-lejizlativa sira,” Ministru Fidelis relata hafoin ramata reuniaun KM iha Palásiu Governu, kuarta ne’e.

Portavóz Governu ne’e haktuir, opsaun ne’ebé hili tenke garantia konetividade seguru no kualidade, nune’e bele fó oportunidade ba Timor-Leste  hodi dezenvolve ekonomia dijitál nasionál no promove interese nasionál, inklui soberania, seguransa, sibernétika no direitu ekonómiku.

Hafoin grupu traballu halo aprezentasaun ba projetu ne’e Governu apresia no halo aprovasaun.

“Entaun ho aprovasaun ida-ne’e loke dalan iha tempu badak Governu sei konsentra didi’ak no dudu lalais ligasaun kabu submarinu hosi tasi-mane sei dada hosi Austrália mai Timor-Leste,” Ministru Fidelis akresenta.

Iha aprezentasaun ne’e mosu diskusaun kle’an kona-ba modelu tipu investimentu no natureza projetu nian.

Biban ne’e, ezekutivu sira rona mós relatóriu estudu kona-ba retornu investimentu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here