Ofisiál F-FDTL iha selebrasaun Aniversáriu FALINTIL ba dala-44 iha Kuartél Jenerál Fatuhada, Dili, 20 Agostu 2019. Imajen Tatoli/António Gonçalves

DILI, 28 outubru 2020 (TATOLI)–Liuhosi reuniaun Konsellu Ministru (KM), ezekutivu sira aprova projetu dekretu-lei ne’ebé define regulamentu foun hosi Lei Serbisu Militár nian.

Ministru Prezidénsia Konsellu Ministru, Fidelis Manuel Leite Magalhães, informa diploma ne’e aprezenta hosi Ministru Defeza, Filomeno de Jesus Paixão

“Dekretu lei foun serbisu militár ne’e loke dalan ba serbisu militár obrigatóriu ba foin-sa’e sira, ne’ebé mak iha tempu oin-mai ho idade 18 bele halo resensiamentu no tinan 20 bele hola parte iha skema ida ho períodu fulan-18, ba timor-oan sira ho idade 18 to’o 28,” Ministru Fidelis relata hafoin ramata reuniaun KM iha Palásiu Governu, kuarta ne’e.

Portavóz Governu ne’e esplika, foin-sa’e sira ne’ebé atinje tinan 20 maibé tanba motivu hanesan eskola hela, sira bele haruka karta hodi defere no la presiza hola parte tanba sira halo direkerementu.

Aleinde ne’e, sira ne’ebé ho motivu relijiaun ka motivu sira seluk maka iha objesaun atu hola parte, iha klaúza ida maka loke dalan ba sira.

Tuir Governu, programa ne’e importante atu halo metin liután sidadania no nosaun patriotika ba foin-sa’e sira ho mekanizmu durante fulan-18 ne’e atubele fó oportunidade vokasionál ba sira ne’ebé maka organizadu, atu nune’e bainhira foin-sa’e ida ramata ninia serbisu militár obrigatóriu prontu atubele sai sidadaun ida ne’ebé maka produtivu.

“Regulamentu foun ne’e ho objetivu atu kompatibiliza inovasaun ne’ebé introdús iha estatutu militár foun FALINTIL-Forsa Defeza Timor-Leste (F-FDTL) kona-ba rekrutamentu efetivu ne’ebé adota sistema serbisu militár obrigatóriu, hodi hatán ba nesesidade militár no ba propózitu programátiku governamentál enúnsiadu sira,” nia subliña.

Ho introdusaun servisu militár obrigatóriu, bele kondús nesesidade ba reestruturasaun iha rekrutamentu militár no reorganozasaun hosi faze oioin kona-ba prestasaun servisu miltár ho efetivu normál, ho forma atu promove ho efikásia no efisiénsia ba serbisu militár no sivíl ne’ebé envolve direta ba kumprimentu obrigasaun militár.

Governu espera katak iha programa ne’e bele inklui komponente importante sira, liuliu relasiona ho konsensilizasaun no prevensaun ba moras hada’et sira hanesan moras HIV/SIDA, TBC no seluk tan, ne’ebé hanesan moras ne’ebé dala barak ninia vítima mak foin-sa’e sira tanba sira ladún iha koñesementu kle’an kona-ba moras hirak ne’e.

Dekretu Lei ne’e sei haruka ba Prezidente Repúblika hodi promulga, maibé Governu mós prepara hela kondisaun sira para implementa diploma ne’e.

Bainhira dekretu-lei ida ne’e tama ein vigór maka sei iha prosesu sira hanesan rekrutamentu, fasilidade infraestrutura sira atu apoiu programa ne’e rasik.

Ba inisiativa ne’e, Ministériu Defeza iha hela esforsu barak no hakle’an liután preparativu sira hodi nune’e bele implementa lejizlasaun ne’e.

Ho sistema militár obrigatóriu ne’e obrigatoriadade katak bainhira foin-sa’e iha ona tinan 18, tantu feto ka mane tenke aprezenta-an katak tinan to’o ona, maibé to’o idade 20 sidadaun sira ne’ebé maka identifikadu ou rejistu ona sei bolu hola parte iha programa serbisu militár obrigatóriu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here