Ofisiál treinadór hosi instituisaun F-FDTL), Tenente Baldino Julião António Martins, hasai foto hamutuk ho atleta sira hosi komponente Terrestre Baucau, hafoin partisipa eventu bodybuilding Timor Oan iha Timor Plaza, Dili 2019. Imajen/Espesiál

DILI, 27 outubru 2020 (TATOLI)-  Ofisiál treinadór desportu bodybuilding hosi instituisaun FALINTIL-Forsa Defeza Timor Leste (F-FDTL), Tenente Baldino Julião António Martins, promete lori atleta Cleto Suzano Afonso, okupa klase  Mr. Muscle iha futuru.

Notísia Relevante : Cleto, hakarak sai eroi foun iha Bodybuilding

Promesa ne’e komandante kompañia Delta Komponente Terrestre Baucau hato’o tanba antes ne’e konsege lori ona atleta Cleto okupa primeiru lugár iha klase Mr. Physique iha kompetisaun bodybuilding Timoroan ne’ebé realiza iha sábadu (24/10), iha Timor Plaza, Dili.

“Atleta ne’ebé sai ona manan na’in, ne’e hatudu katak, ninia abilidade ne’e di’ak liu ona. Entaun, iha kompetisaun ne’e iha klase tolu, kompostu hosi Mr. Physique, Mr. Muscle, no Mr. body builder. Tinan ne’e Cleto okupa ona iha klase Mr. Physique, no tuir planu iha tinan oin, ami hakarak atu nia bele sa’e tan ba iha klase Mr. Muscle,” Tenente Baldino hato’o promesa ne’e liuhosi dada lia ho jornalista iha edifísiu Agência Tatoli, ohin, iha Faról, Dili.

Ofisiál treinadór ne’e mós sei ba fó koñesimentu ba komandante Komponente Terrestre Baucau, sei aprezenta kona-ba susesu sira iha eventu, foin lalais ne’e, inklui difikuldade ne’ebé sira enfrenta, atu nune’e komandante sira bele intende prosesu no lala’ok preparasaun hotu, nune’e sira bele fó tempu barak liu ba atleta atu halo preparasaun.

“Hakarak sa’e klase, signifika tenke aumenta tempu ba preparasaun, volume treinu tenke aumenta tan, dixiplina tenke rigorozu liután,” nia subliña.

Nia esplika kona-ba preparasaun katak, hanesan militár, treinu fíziku ne’e hola parte ona iha vida militár, tanba bainhira tama militár tenke preparadu iha fíziku.

Kona-ba prosesu atu asesu to’o iha kompetisaun nasionál ne’e, nia esplika, antes ne’e atleta Cleto involve-aan iha grupu strong gym, nune’e komisaun organizadora haruka karta konvite ba iha grupu ne’e, grupu ne’e rasik halo selesaun ba atleta Cleto nu’udár membru F-FDTL, ikus mai grupu halo fali karta pedidu ba Komponente Terrestre atu despaxa atleta ne’e hodi partisipa treinu iha strong gym, akompaña hosi strong gym ninia instrutór ho nia durasaun preparasaun rutina semana neen.

Nu’udár ofisiál treinadór, Baldino hala’o knaar hodi kontrola de’it oráriu treinu nian, fó xamada atensaun ba atleta sira atu labele hadeer barak liu, tenke deskansa tuir oras, haree mós sira-nia dieta hahán nian.

“Atleta sira mak konfia ha’u atu sai hanesan sira nia ofisiál treinadór, hodi fó apoiu morál, no fó korajen atu oinsá partisipa iha kompetisaun ne’e. Entaun, ha’u lori sira ba aprezenta iha komandante, hodi husu autorizasaun, tanba ami servisu ho orden. Tanba ne’e mak tenke halo pedidu autorizasaun ba iha ami nia komandante komponente,” nia esplika.

Nia haktuir, atleta sira iha tinan 2019, na’in-tolu mak partisipa, maibé iha tinan ida-ne’e na’in-rua de’it mak partisipa tanba atleta ida oras ne’e kumpre hela misaun iha Manduki Maliana.

“Ha’u hanesan ema ne’ebé hadomi desportu barak-liu, maibé ba ha’u desportu bodybuilding ne’e mak todan liu hotu,” nia konsidera. Tanba ne’e, Tenente F-FDTL ne’e dehan, tenke treinu durante oras tolu to’o haat kada loron, deskansa oras-rua ka oras-tolu iha loraik kontinua fali, tanba ne’e mak tenke ezije nafatin atleta sira, nune’e mós kona-ba dieta hanesan iha hahán balun ne’ebé mak sira labele han, liuliu sira nia volume hahán ne’e tuun maka’as, tanba bodybuilding ne’e ema nia isin tenke maran, atu nune’e, bele iha forsa no labele iha mina.

Durante treinu, nia hatutan, treinadór sempre ajuda atleta sira hodi jere tempu ho di’ak, tanba komandante sira mós fó tempu oinsá atleta sira autorizadu atu hala’o treinamentu rutina durante semana-neen, no foka liubá treinu, labele halo fali atividade sira seluk.

“Ha’u orgullu tebetebes no ha’u nia lia-fuan simples ne’ebé fó motivasaun ba atleta sira maka, ita nia aman sira sai eroi, tanba sira kontra inimigu. Maibé, agora iha ita-nia tempu la presiza atu halo tan hanesan saida mak uluk ita-nia aman sira halo. Ita tenke esforsu de’it hodi sa’e palku no manan taxa ida maski tama de’it iha torneiu ida ne’e mós orgullu ona, tanba bele konsidera hanesan eroi foun iha tempu ohin loron. Ita koko mantein atu hamorin nafatin, maibé iha situasaun ho kondisaun ne’ebé mak diferente,” treinadór ne’e espresa.

Kona-ba prémiu, treinadór ne’e espresa katak, nia labele dehan satisfás, maibé atu dehan katak, bainhira atu hahú buat ida karik, kondisaun mak hanesan ne’e ona, tanba kompañia ka emprezáriu sira ne’ebé hadomi desportu mak tau hanoin hamutuk hodi realiza eventu ida-ne’e.

“Ko’alia loloos de’it katak, osan ka prémiu ne’ebé sira fó ba ami, osan ne’e la konsege rekupera fali orsamentu ne’ebé ami uza durante hala’o treinamentu. Ami gasta barakliu, ba fatin treinamentu ne’ebé ami aluga, gasta ba suplementu, loloos ne’e ami mós tenke fó treinadór iha gym ne’e ninia kolen, maibé sira fó treinamentu gratuita de’it ho hanoin ida katak, hakarak atu tulun membru hosi instituisaun  F-FDTL. Durante treinu ne’e ami gasta $2.000,” Tenente  ne’e sita tan.

Jornalista   : Cipriano Colo

Editór        : Francisco Belo

HAKEREK NO HATÁN

Please enter your comment!
Please enter your name here