Akampamentu ka camping/. Imajen/foti hosi Google

DILI, 27 outubru 2020 (TATOLI)- Komandu Jerál Polísia Nasionál Timor-Leste (PNTL) klarifika, operasaun ne’ebé Komandu Polísia Munisípiu Dili halo hodi kontrola atividade juventude balun hodi halo akampamentu ka camping iha área tasi-ibun Kristu Rei, Dili, nu’udar parte ida atu fó edukasaun di’ak no kontrola movimentu juventude sira bele hametin liután paz no estabilidade.

Portavós Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira

Portavós Komandu Jerál PNTL, Superintendente Xefe, Arnaldo de Araújo, klarifika ba públiku katak, tuir loloos polísia halo movimentu ba atu kontrola no la’ós atu sobu tenda hirak ne’ebé grupu juventude balun harii besik kedas iha área Kristu Rei nia kotuk.

PNTL rasik simu keixa balun hosi komunidade katak, akampamentu ka camping balun ne’ebé joven sira harii uza ba fatin namoradu nian no hemu tiha tua maka ba deskansa iha tenda-laran.

“Komandu PNTL intensaun atu haree tenda akampamentu ka camping ne’ebé ema balun harii la’ós atu sobu, maibé atu kontrola de’it no fó edukasaun di’ak ba ita-nia juventude sira, tanba dala barak iha tenda akampamentu latan bele iha feto-ida, mane-rua ka mane-ida feto-rua, tanba ne’e ita haree hodi fó hanoin ba sira atu kontrola aan. Tanba ema hotu iha liberdade atu bele halo akampamentu ka camping, maibé ita tenke iha morál no edukasaun atu hato’o ba ita nia komunidade sira no juventude sira bele iha koñesimentu kona-ba atividade sira ne’e ho pozitivu,” portavós Komandu PNTL, Superintendente Xefe, Arnaldo de Araújo, esklarese  ba jornalista, ohin, iha Komandu Jerál PNTL, Caicoli, Dili.

Nia dehan, ohin-loron problema ema soe bebé iha fatin públiku sira, tanba juventude feto-mane moris livre liu no dala ruma inan-aman sira la kontrola atividade ne’ebé joven sira hala’o liuhosi camping bele hamosu problema negativu ba joven sira-nia moris.

“Ita hakarak eduka ita nia juventude sira ho intensaun di’ak, tanba ita haree agora ne’e ema soe bebé, ema tara aan to’o mate, problema oho malu, tanba iha fatór ida mai hosi buat ida camping ne’e,” Arnaldo argumenta.

Komandu PNTL aproveita tempu ne’e apela ba inan-aman sira atu kontrola oan-feto no oan-mane sira ne’ebé halo movimentu iha akampamentu durante tempu kalan, tanba sira lori tua ba hemu no dala ruma la kontrola aan bele monu ba tentasaun aat.

Portavós PNTL hatutan, Komandu PNTL implementa nafatin lei no orden no simu nafatin kritika ho sujestaun  di’ak hosi públiku sira, liuhosi média sosiál Facebook.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here