Imajen/Espesial.

DILI, 27 outubru 2020 (TATOLI)—Governu liuhosi Programa Nasionál Dezenvolvimentu Suku (PNSD) apoiu osan hamutuk rihun $39 ba Suku Samalari hodi halo estrada ba komunidade sira.

Notisia Relevante: Tinan 2020, PNDS Hakarak Revé Matadalan Implementasaun Programa

“Ami-nia planu ne’ebé mak atu halo estrada iha Suku Samalari ne’e hetan apoiu hosi PNDS ho montante rihun $39,” Xefe Suku Samalari, Sorteiro Magno Siqueira, informa ba Agência TATOLI via telefónika, segunda ne’e. 

Nia dehan Konsellu Suku Samalari, Postu Administrativu Baucau-Vila, Munisípiu Baucau, hamutuk ho PNDS halo estrada ba Suku Samalari ho nia naruk kilometru 2,5 (2500m).

“Ami konsellu suku planu halo estrada ba Suku Samalari hahú hosi Sentru Saúde Samalari to’o iha aldeia Ossoluga-afanamibere ho kilometru 2,5 iha novembru tinan ne’e,” Xefe Suku ne’e hateten.

Tuir nia, estrada ne’e la’ós uza alkatraun mak fui maibé uza rai-henek hodi hateru no halo mahar. Komunidade Samalari presiza halo estrada tanba difikulta sira-nia atividade negósiu hosi suku ba iha Baucau-vila entaun konsellu suku hamutuk ho PNDS sei implementa iha novembru tinan ne’e.

Xefe suku ne’e informa, Suku Samalari iha aldeia haat (4) mak hanesan Aldeia Samalari, Ossoluga, Festau, no Aldeia Sorulai ne’ebé mak ho nia xefe família hamutuk 683.

Programa Nasionál Dezenvolvimentu Suku (PNDS) hahú dezenvolve iha tinan 2012 ho baze legál mak rezolusaun Governu Nú. 1/2012, 25 janeiru. Polítikamente PNDS nu’udar jestu estratejia Governu nian ne’ebé ho objetivu atu hadi’ak kondisaun sosio-ekonómiku no governasaun lokál di’akliu ba mane no feto sira iha suku iha Timor-Leste liuhosi konstrusaun infraestrutura ne’ebé sira rasik mak jere. Polítika sira-ne’e “ho prinsipiu ema servisu hamutuk hodi hadi’a suku liuhosi planu ne’ebé mak komunidade rasik define prioridade dezenvolvmentu bazea ba sira-nia nesesidade hanesan infraestrutura báziku (bee-moos, estrada, irrigasaun, sentru komunidade nst).

 Sé mak sei jere PNDS?

PNDS nia prosesu tomak jere hosi Governu liuhosi Ministériu Administrasaun Estatál (MAE) no kria ona kondisaun oin-oin hodi forma estrutura  hahú hosi Sekretariadu Nasional PNDS, Ekipa PNDS Distritu, Fasilitadór PNDS Postu Administrativu no kompozisaun estrutura PNDS iha suku mak hanesan Komite Planeamentu no Akuntabilidade (KPA), Ekipa Implementasaun Projetu (EIP), Ekipa Jestaun Suku (EJS), Ekipa Operasaun no Manutensaun (EOM) no mós Fasilitadór Suco (FS) sira-ne’e mak sei hanesan responsavel tékniku ba iha implementasaun PNDS hamutuk ho komunidade tomak mak sai hanesan autór prinsipál jere no maneja planeamentu no implementasaun PNDS.

Sé mak sei halo implementasaun projetu PNDS? 

Implementasaun projetu PNDS ne’e hala’o hosi komunidade tomak servisu hamutuk hodi planu, hari’i no maneja Infraestrutura ho partisipasaun ativa hosi ema hotu-hotu–la´ós mane deit–feto no mane no grupu vulnerábel sira sei halo planu, harii no maneja nia projetu rasik, duké depende de’it ba kontraktór sira atu hari’i  Komunidade sira iha kbiit  no abilidade projetu ne´e sei hari’i ho kbiit sira-ne´e.

Partisipasaun komunidade nian ho kapasidade planeamentu no Jesatun infraestrutura lokál sai hanesan baze fundamentál ne’ebé improtante hosi prosesu implementasaun ba Planu Nasionál Dezenvolvimentu suku nian.

Baze Fundamentál Hodi Implementa Politika PNDS

Polítika Governu estabelese PNDS bazea ba baze legál sira mak hanesan tuir main; Lei Nú. 3/2009, 8 Jullu (Lideransa Tradisionál), Dekretu Lei Nú. 4 /2012, 15 Juliu (PDID), Rezolusaun Governu Nú. 1/2012, 15 Janeiru (Aselera Dezenvolvimentu Komunitária), Diploma Ministeriál Konjuntu Nú. 22/2012, 27 Juñu (Kommisaun Inter-Ministeriál no Grupu Traballu  Tekniku Inter-Ministeriál), no Dekretu Lei PNDS Nú. 08/2013, Abríl 2013. 

Enkuadramentu legál ne’ebé mensiona iha leten mak sai hanesan ka rejime regulatóriu ida ba Governu RDTL hodi implementa Planu Nasionál Dezenvolvimentu Suku (PNDS) nian ne’ebé submete ba konstituisaun RDTL artigu 5 (Desentralizasaun), artigu 71 (Organizasaun Administrativa), no artigu 72 ( Poder Lokál).

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here