Primeiru-Ministru, Taur Matan Ruak, hamutuk ho membru Governu diskute pedidu renovasaun deklarasaun EE hosi Prezidente Repúblika, iha Sala plenáriu , tersa (27/10). Imajen Tatoli/Egas Cristovão

DILI, 27 outubru 2020 (TATOLI)Primeiru Ministru, Taur Matan Ruak, felisita entidade hotu nia luta koletiva hodi prevene no kombate COVID-19 ne’ebé to’o oras ne’e seidauk rejista ema mate, kompara ho nasaun seluk.

“Ita rejista kazu COVID-19 hamutuk 30, ne’ebé iha 29 maka rekuperadu no laiha mate. Ida-ne’e hanesan konkista koletiva povu no nasaun, la’os Governu nia de’it maibé konkista koletiva ita hotu nian,” Xefe Governu hateten durante apresiasaun pedidu autorizasaun atu renova deklarasaun Estadu Emerjénsia (EE) dahitu, iha sala plenáriu Parlamentu Nasionál, tersa ne’e.

Pandemia globál ne’e konsege hamate ema millaun ida no kuaze millaun 43 mak afetadu moras ne’e iha mundu tomak, maibé país 23 seidauk rejista ema mate inklui Timor-Leste.

PM dehan, Governu investe ona tempu no rekursu ba medida prevensaun, liuliu kontrola ema no sasán ne’ebé tama liuhosi fronteira terrestre, marítima, aéreu no kuaretena, inklui tau-matan sanitáriu no risku sira hotu atu kazu importadu labele kontajia ba sosiedade.

“Ita-nia rejime jurídiku no medida sira bele implementa ho rigór iha sosiedade nia leet no ita aplika Estadu Emerjénsia ho fundamentu iha situasaun kalamidade públika,” nia akresenta.

Nune’e, Xefe Governu husu Deputadu sira iha Parlamentu Nasionál atubele autoriza estensaun EE ba dahitu atu Prezidente Repúblika dekreta ba loron-30.

“Vírus COVID-19 seidauk hotu no kontinua sirkula iha mundu, ne’ebé sidadaun hotu presiza tuir regra sanitária,” PM fó hanoin.

Pedidu Governu ba estensaun EE tanba haree ba evolusaun preokupante ba situasaun epidemiolójika no proliferasaun kazu rejistadu ne’ebé aumenta iha nível rejionál no mundiál.

Governu hato’o pedidu ba Prezidente Repúblika atu halo renovasaun tanba EE ba daneen sei termina iha 03 novembru 2020.

Kazu rejistadu COVID-19 iha Timor-Leste to’o oras ne’e nu’udar kazu importadu, tanba ne’e Governu hasai medida forte ba períodu EE daneen, ne’ebé hahú 05 outubru ba sira ne’ebé sai-tama territóriu nasionál bainhira la kumpre regra sei selu multa entre $30 to’o $250 no tenke selu rasik kuarentena.

Governu implementa medida prevensaun liuhosi selu multa ba sira ne’ebé la kumpre regra tanba númeru sidadaun sira halo pasajen ilegál iha fronteira terreste aumenta ba bebeik.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here