Logo UNTL.

DILI, 27 outubru 2020 (TATOLI)—Ministru Turizmu Komérsiu no Indústria (MTCI-sigla portugés), José Lucas do Carmo da Silva ho Reitór Universidade Nasionál Timor Lorosa’e (UNTL), tersa ne’e asina  ona nota intendimentu (MoU-sigla inglés) hodi fó oportunidade ba funsionáriu MTKI hodi estuda iha UNTL.

“Ohin ita asina MoU ho UNTL ne’e para atu haforsa, no hakbi’it kapasidade funsionáriu sira iha MTKI atu nune’e bele kapasita funsionáriu sira, tanba ita presiza atu eleva kapasidade funsionáriu sira nian iha futuru,” Governante ne’e informa ba jornalista sira iha Kampus UNTL, ohin.

Nia nota funsionáriu barak maka sei ho nivél edukasaun ki’ik  (sekundária)tanba ne’e, presiza atu kontinua tan sira-nia estudu iha universidade.

Governante ne’e hateten, hasai ona sirkulár ida ba diresaun hotu atu identifika funsionáriu hira maka persiza atu kontinua sira-nia estudu iha UNTL.

“Agora husi kursu ne’ebé mak MTKI presiza mak área turizmu,  ekonomia tanba iha ministériu nia laran to’o agora tékniku sei menus tebes ne’e duni presiza tebes atu priénse ramu sira ne’e. MoU ida ne’e ba tempu naruk hodi loke dalan ba kooperasaun sira seluk ne’ebé sei tuir mai,” nia hateten.

Iha biban hanesan Magnífiku Reitór UNTL, Francisco Miguel Martins, dehan UNTL sei fó oportunidade ba funsionáriu MTKI atu integra ba kursu ekonomia, enjinária no indústria nune’e  bele dezenvolve instituisaun estadu ne’e iha futuru.

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here