PNTL halo operasaun iha área Portu Dili nian, segunda kalan (26/10), konsege identifika motorista barak maka lori transporte la iha dokumentu. Imajen/PNTL

DILI, 27 outubru 2020 (TATOLI)- Komandu Jerál Polísia  Nasionál Timor-Leste  (PNTL) hatún ona orden ba komandu PNTL munisípiu hotu- hotu atu halo operasaun maka’as ba transporte públiku no transporte Estadu sira hodi evita asidente tráfegu durante selebrasaun loron Finadu.

Portavós Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira

Portavós Komandu Jerál PNTL, Superintendente Xefe, Arnaldo de Araújo, hateten agora ne’e movimentu transporte ba munisípiu hahú la’o maka’as. Tanba ne’e, PNTL sei halo pasa revista iha fatin públiku sira.

Nia hatutan, iha Dili rasik, Komandu PNTL Unidade Tránzitu Dili kontinua halo operasaun hodi prevene  asidente tráfegu.

“Ita nia polísia sira iha Dili kontinua halo atividade check point iha tempu kalan hodi kontrola movimentu transporte públiku sira ne’ebé sirkula iha Dili sai ba munisípiu la ho dokumentu própriu sira sei prende,” portavós Komandu PNTL, Arnaldo de Araújo, hateten ba jornalista, ohin, iha Komandu Jerál PNTL, Dili.

Nia dehan, iha segunda kalan, PNTL halo operasaun iha Dili iha área Portu Dili nian konsege identifika motorista barak maka lori transporte la iha dokumentu. Polísia mós halo apreensaun ba motorizada sira tanba dokumentu balu la iha no balu inválidu ona.

“Operasaun ne’e ita kontinua halo, tanba ita hatene katak, iha loron feriadu ba loron Finadu ema hotu- hotu halo movimentu ho transporte dokumentu tenke kompletu,” Arnaldo hateten.

Nia dehan, PNTL mós la tolera kualkér funsionáriu públiku to’o kargu xefia sira utiliza karreta Estadu halo viajen iha loron feriadu laho guia de marxa.

Jornalista   : Eugénio Pereira

Editór        : Francisco Simões

 

 

 

1 KOMENTÁRIU

  1. Tenke nune’e duni, dokumentus mak haluhan iha uma, ne’e sei kategoria diak, tamba sei fohatene para tenke tau copia dokumentus iha motor ou kareta laran. maibe que ida dokumentus laiha liu ne’e tenke kaer tamba ne’e signifika sira ne’e utiliza motor ou kareta ilegal, antaun ILEGAL ne’e KRIME. tenke prende duni. bom tranbalho, grande abraco

HAKEREK NO HATÁN

Please enter your comment!
Please enter your name here