Vise Primeiru-Ministru no Ministru Planu no Ordenamentu, José Maria dos Reis, entrega produtu Cesta Bázika simbolikamente ba komunidade. Imajen Tatoli/Antónia Gusmão

METINARO, 27 outubru 2020 (TATOLI)–VIII Governu Konstitusionál liuhosi Ministériu Turizmu, Komérsiu no Indústria (MTKI) ofisialmente halo lansamentu nasionál ba distribuisaun programa Cesta Bázika iha ámbitu rekuperasaun ekonómika kurtu prazu.

Liuhosi diskursu iha ámbitu lansamentu programa nasionál ne’e, Vise Primeiru-Ministru no Ministru Planu no Ordenamentu, José Maria dos Reis, konsidera atividade ne’e hametin liután espíritu solidariedade.

“Loron ohin ita mai hamutuk atu hakat pasu dahuluk ba programa ida-ne’e, aproveita atu fó hanoin ba ita hotu katak medida ne’e atu hametin espíritu solidariedade. Solidariedade la’ós ismola tanba konstrusaun ba sosiedade ida justu ne’e responsabilidade ita hotu nian, liuliu membru Governu,” Vise PM José Maria hateten iha suku Sabuli, postu administrativu Metinaro, munisípiu Dili, tersa ne’e.

Notísia Relevante: Governu ofisialmente halo lansamentu nasionál programa Cesta Bázika

Membru ezekutivu ne’e hatutan, espíritu solidariedade depende individu idaidak, hahú entidade responsável to’o populasaun ein jerál atu kontribui ba susesu ne’ebé sei reflete iha bein estar ema hotu nian.

“Ita labele haree de’it atividade ne’e hanesan projetu, maibé tenke haree hanesan asaun ne’ebé fó kontribuisaun ba dignidade ema hotu, individuál no koletivamente,” nia akresenta.

VIII Governu Konstitusionál halo lansamentu nasionál programa Cesta Bázika iha suku Sabuli, tersa (27/10). Imajen Tatoli/Antónia Gusmão

Programa Governu iha ámbitu rekuperasaun ekonómiku ne’e deside ho hanoin atu garante katak ema hotu iha Timor-Leste iha asesu ba produtu ai-han ne’ebé nesesáriu ho nutrisionál, kombate hamblaha, má-nutrisaun no situasaun vulnerável seluk.

Aleinde ne’e, fó prioridade ba produtu lokál ho objetivu atu apoiu agrikultór no produtór lokál iha rai-laran no serbisu hamutuk ho loja no fornesedór no komersiante sira ne’ebé iha ona Timor-Leste hodi apoiu mós situasaun ekonómika no garante sustentabilidade, atu nune’e sira la taka empreza ne’ebé kontribui ba aumentu dezempregu iha rai-laran.

“Ho medida ida-ne’e ita haree ita sei sosa bote hira, fó empregu iha rai-laran, ne’ebé iha ona impaktu emediatu ida,” Ministru hatutan.

“Hato’o obrigadu ba esforsu tomak hosi entidade relevante, espesialmente ba parseiru dezenvolvimentu sira ne’ebé apoiu Governu batalla hasoru COVID-19 no kolaborasaun iha implementasaun ho medida rekuperasaun ekonómika,” nia apresia.

Nune’e mós, governante ne’e agradese ba povu tomak nia kooperasaun, paséensia no reziliénsia durante tempu susar maibé sempre hamutuk no konsege hakat liu dezafíu ida-ne’e no sai forte liután nu’udar nasaun no povu.

“Apela ba komunidade tomak hosi munisípiu to’o aldeia ne’ebé maka ohin loron tau-matan hela ba pasu boot ne’ebé  Governu lansa ho distribuisaun medida Cesta Bázika, atubele prepara-an di’ak liu tanba iha tempu badak ekipa sei tun ba halo distribuisaun,” Ministru hatutan.

Programa cesta bázika fixa membru idaidak agregadu familiár sei hetan $25, kada fulan iha fulan rua nia laran no bele troka ho folin sasán ne’ebé korresponde ba valór osan.

Governu sei implementa medida haat ho kustu totál millaun $113,4, ba kurtu prazu hanaran mitigasaun impaktu ekonómiku no sosiál ba krize COVID-19, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normalize hikas atividade ekonómika.

Hosi medida haat ne’e, inklui hotu ho Cesta Bázika ba família, ho totál kustu ba implementasaun hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Jornalista: Antónia Gusmão

Editora: Julia Chatarina     

1 KOMENTÁRIU

  1. programa guvernu nian iha ambitu rekuperasaun ekonomia, ho “cesta basico” ne’e hanoin no akasaun ida que LA LOS. purque cesta basico aihan sira ne’e sira ba han loron rua ou tolu ou too semana ida deit. tamba diak liu mak guvernu tenke halo:
    1. Irigasaun para agricultor sira halo natar ho haksolok
    2. dada be’e mos ba komunidade area rural hodi povu sente haksolok
    3. dada eletrisidade ba aldeia sira ne’ebe seidauk asesu ba eletrisidade nia naroman
    4. halo postu saude ba aldeia ne’ebe dook hosi postu saude nune’e povu fasil atu asesu.
    halo favor boot ida, povu mak hili imi sai boot antaun tenke husik hela kadeira sofa no AC no officina ne’ebe diak iha loron balun nia laran hodi tun direta hodi visita ofisial sira ne’ebe halo servisu iha fatin hodi kontrola direta. tamba wainhira iha planu antaun iha aksaun no iha aksaun tenke iha mos kontolu mak foin dehan servisu ho lolos. grande abrasu graca Maromak nian hau fiar katak ita sei lori TL sai hosi mukit no kiak. amin

HAKEREK NO HATÁN

Please enter your comment!
Please enter your name here