Prezidente Assalam FC, Hipolito Soares. Imajen/espesiál

DILI, 27 outubru 2020 (TATOLI) – Prezidente Assalam FC, Hipolito Soares hateten, hakarak futeból iha Timor-Leste ba oin no sai hanesan kultura ida tenke sai prioridade iha polítika nasionál, nune’e bele foti desizaun sériu  ba dezenvolvimentu futeból iha nasaun ne’e.

“Ita nia hakarak, futeból ne’e sai ita nia kultura ida, primeiru tenke sai polítika nasionál, tenke iha desizaun ruma kona-ba desportu iha ita nia rai, liu-liu futeból,” dehan Hipolito ba Agência Tatoli, ohin, iha kampu Federasaun Futeból Timor – Leste (FFTL), Dili.

Alende sai hanesan polítika nasionál, Hipolitufó hanoin katak, kona-ba futeból kompara ho edukasaun prepara uluk mestre oinsá mak bele hanorin fali alunu sira.

“Ita ko’alia kona-ba futeból hensan edukasaun karik ita prepara uluk mestre, ida ne’e iha futeból mak saida, treinadór sira. Ita tenke prepara uluk treinadór sira. Ita haree ita nian agora nivel C mak barak. Iha futeból sertifikadu treinadór hahú hosi D-A,” nia dehan.

Nia esplika, sertifikadu D nia funsaun atu halo anima de’it jogadór sira, maibé seidauk treinu buat ruma ba jogadór sira. Nivel C nia servisu atu fó treinamentu foku ba tékniku kontrola pasa bola, kabesa bola no seluk tan mak hanaran tékniku. Enkuantu Nivel B fó treinamentu ba matéria difisil sira oinsá atu utiliza iha kampu laran.

Tuir nia haree, futeból iha nasaun ne’e seidauk lao ba oin ho di’ak tanba menus treinadór.

“Ita nia treinadór mak sei menus liu. Nivel C ne’e foin mak na’in-50 resin, maibé barak liu la ativu, ativu na’in-10 de’it, oinsá mak bele prepara jogadór sira ba oin hodi hadi’a futeból,” nia afirma.

Iha parte seluk, nia komenta katak, maski treinadór ho jogadór bele barak maibé infraestrutura ba futeból la sufisiente mós sei la lori futeból ba oin.

“Ita iha ona treinadór barak mós bainhira haree situasaun agora infraestrutura laiha mós la bele nafatin, treinadór sira atu implementa treinamentu ba jogadór sira iha fatin ne’ebé, kuandu ita haree fatin ba futeból seidauk iha no sufisiente, ida ne’e mak ita-nia problema,” nia hateten.

Nia sujere ba parte hotu atu primeiru tenke investe uluk iha treinadór ba nivel A ho B barak no investe iha infraestrutura hanesan harii kampu treinamentu no Estádiu lima (5) iha Dili.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here