Imajen Espesiál.

DILI, 27 outubru 2020 (TATOLI)—Bankada Congresso Nacional da Reconstrução de Timorense (CNRT) kontinua husu ba VIII Governu Konstitusionál atu evita surtu COVID-19 labele hada’et mai Timor-Leste, Governu tenke bandu ema estranjeiru sira tama mai territoriu Nasional Timor-Leste. 

Notisia Relevante: Bankada FRETILIN espera Governu hamosu kuadru legál antesipa surtu COVID-19

“Bankada CNRT kontinua husu ba Governu atu evita vírus corona tama iha Timor-Leste. Dalan loos liu mak tenke asegura pontu entrada sira no labele hatama ema mai Timor-Leste. Tau matan ba fronteira terrestre, portu no aeroportu,” deklarasaun polítika hosi bankada CNRT ne’e, leitura hosi Deputadu Gabriel Soares liuhosi plenária estraordiária iha debate estensaun EE dahitu, tersa ne’e.

Bankada CNRT mós husu Governu solsuiona subsídiu dignu ba frontline sira, labele atraza iha pagamentu ba sira-nia direitu tanba sira merese hetan apoia tanba sira servisu iha área ne’ebé risku-aas no sei simu uluk konsekuensia hosi vírus bainhira mosu transmisaun lokál.

“Ábitu foun Timor-Leste mak Estadu Emerjénsia fulan-fulan, Estadu lakon kbiit atu buka dalan seluk. Embora, Bankada Governu lakohi atu aprova Lei Protesaun Sívil. Maibé, ita sei iha própria lei sira-ne’ebé bele uza hodi halo vijilánsia ba ita-nia sidadaun sira no halo kontrollu ba mobilidade ema estranjeiru sira-nian,” Reprezentante Bankada CNRT ne’e hateten.

Bankada CNRT preokupada ho Estadu Emerjénsia ne’ebé sempre marka ho sidadaun-ida hosi estranjeiru infetadu pozitivu COVID-19, ne’e beibeik tiha ona bainhira atu termina Estadu Emerjénsia mosu kazu foun.

Nia hatutan, hafoin Parlamentu Nasionál aprova estensaun EE, kazu pozitivu lakon mesak tiha de’it.

“Ne’e hatudu momoos la’ós ona koinsidénsia maibé planeadu hodi fábrika moras atu halo ta’uk povu no fó dalan ba Estadu Emerjénsia. Bankada CNRT husu ba Governu atu para ona kari rai-rahun ba Povu nia matan,” nia dehan.

Bankada CNRT afirma Estadu Emerjénsia dahitu ne’e sei rai mós problema lubuk ida ne’ebé to’o agora seidauk rezolve tanba sidadaun lubuk ida kontinua reklama pagamentu familiár ne’ebé liu ona fulan-haat seidauk simu, ne’ebé Ministra Solidariedade Sosiál kontinua fó promesa falsu ba mídia no mai bosok iha plenária ida-ne’e ho malorek tebes.

Nia haktuir, frontline sira to’o agora barak mak la simu sira-nia direitu, ótel no catering la selu, subsídiu ba empreza no traballadór sai la klaru no laiha manutensaun ba fasilidade kuarentena no izolamentu, laiha subsídiu dignu ba ekipa vijilánsia no ambulánsia.

Bankada CNRT mós nota hela inkapasidade iha dezempeñu Governu nian ba ezekusaun Fundu COVID-19, pagamentu atrazadu no ezekusaun kiik tebes.

“Ami hakarak dehan, ho orsamentu ho montante kiik de’it labele ezekuta tuir kalendáriu ezekusaun orsamentu nian, oinsá mak Governu ne’e bele ezekuta OJE 2020 no tinan 2021 nian,” nia kestiona.

Bankada CNRT subliña, kestaun hirak ne’e mosu tanba Estadu Emerjénsia nu’udar instrumentu polítika de’it. Foufoun deklara Estadu Emerjénsia atu iha espasu hodi “hadau podér” iha Parlamentu Nasionál, kontinua estende atu limite movimentu no sirkulasaun sidadaun nian hodi ezije prezensa Estadu nian ba impase polítika ne’ebé Prezidente Repúblika rasik ajuda no inventa hodi loke dalan ba FRETILIN atu-bele tama iha VIII Governu.

“Governu ida-ne’e la sériu no foku ba impaktu hosi Estadu Emerjénsia ne’ebé kontribui ona ba resesaun ekonomia nasaun ne’e nian, liuliu povu sofre tanba laiha osan iha sira-nia liman nune’e defísil ba sira atu asesu merkadu hodi atende nesesidade loron-loron nian,” Deputadu Bankada CNRT ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here