Logotipu TDD. Imajen Tatoli/Dok.

DILI, 26 outubru 2020 (TATOLI)-Tribunál Distritál Dili (TDD), adia leitura desizaun ba kazu ró ambulánsia hosi Ministériu Saúde (MS) ne’ebé deskonfia hamosu infrasaun iha prosesu konkursu públiku  ka tenderizasaun.

Notísia Relevante : Kazu ró ambulánsia, MP alega pena prizaun tinan-ualu ba arguidu sira

Ró ambulánsia ne’e Governu liuhosi  MS sosa iha 2012, maibé  la konsege utiliza ho di’ak  tanba avaria tiha, tanba ne’e fó prezuiju ba Estadu lakon osan ho valor purvolta  $414,876.64.

Tuir ajenda loloos, tuku 9:00 dadeer,  ohin, Tribunál koletivu  pronunsia leitura akórdaun. Maibé Tribunál adia tanba juiz koletivu seidauk elabora hotu prosesu konkluzaun hoi alegasaun Ministériu Públiku no defeza nian.

Prokuradór  titular, Rogério Viegas, konfirma, Tribunál  adia fila-fali leitura desizaun ba iha loron 6 novembru,  tinan ne’e, tuku 16:00 Otl.

Antes ne’e, iha loron 28 setembru 2020, Ministériu Públiku (MP) liu hosi Prokuradór titular Rogério Viegas, iha nia alegasaun husu ba Tribunál Distritál Dili (TDD) atu aplika pena prizaun efetivu tinan-ualu (8) no selu indemnizasaun sivíl ba arguidu ho arguida hamutuk na’in-ualu (8) tanba iha faktu provadu iha envolvimentu kazu sosa ró ambulánsia ba Ministériu Saúde.

MP iha nia akuzasaun, akuza arguidu ho arguida hanesan AMPM, JFDOC, JCS, LB, ADC, EDJAM, JCM, nu’udar ko-autór material ho forma konsumada ba krime partisipasaun ekonomia iha negósiu, ne’ebé previstu no punidu iha art°. 299 n°. 1 no 2, hosi Kódigu Penal, ho ninia moldura penal mínimu tinan-tolu  (3) no maxima tinan-15 iha prizaun efetivu.

MP mós akuza arguidu DG  nu’udar autór material ba konkursu krime falsifikasaun dokumentu ne’ebé previstu no punidu iha art°. 303°, ho ninia moldura penal kastigu mínimu loron 30 to’o tinan-tolu (3) ka aplika pena multa, no krime burla agravadu, ne’ebé previstu no punidu iha art. 267 n°. 1 a1. a), hosi Kódigu Penal, ho ninia moldura penal mínimu tinan-tolu (3) no maxima tinan-10 iha prizaun.

Parte Defeza Pedro Aparicio ne’ebé fó asisténsia legal ba arguidu na’in-tolu LB, ADC, EDJAM   iha nia alegasaun hateten, prosesu  kauza ba problema ró ne’e la’ós arguidu sira mak sai hun, tanba sira nu’udar membru CAMS haree de’it ba prosesu administrativu hala’o avaliasaun no rekomendasaun maibé kona-ba polítika atu sosa ró ne’e mai hosi Governu liuhosi ministru tutela mak hatún despaxu.

Defeza hosi arguidu  AMP, JFOC, JC, JDCM husu mós ba tribunál atu absolve arguidu hotu hosi krime ne’ebé parte Ministériu Públiku imputa tanba faktu no natureza krime la relevánsia.

Notísia Relevante : TDD rona sasin eis governante na’in-rua ba kazu ró ambulánsia

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here