Segundu Vise-Prezidente Parlamentu Nasional, Luis Roberto, Deputadu Bankada KHUNTO

DILI, 26 outubru 2020 (TATOLI)—Proposta-lei Orsamentu Jerál Estadu (OJE) 2021 baixa ona ba Komisaun Espesializada Permanente (KEP) sira hodi análize hafoin halo relatóriu no paresér ba proposta-lei refere.

“Ha’u konvida Prezidente Komisaun C (Finansa Públika) atu-bele simu ita-nia proposta-lei 2021,” Prezidente Parlamentu Nasionál Ein-Ezersísiu atuál Vise-Prezidente Parlamentu Nasionál, Deputadu Luis Roberto, informa liuhosi plenária Parlamentu Nasionál, segunda ne’e.

Iha opurtunidade ne’e, Prezidente Parlamentu Nasionál Ein-Ezersísiu ne’e konvida mós prezidente KEP sira seluk hanesan komisaun A, B, D, E, F no komisaun G hodi simu proposta-lei OJE 2021 ne’e.

“Proposta-lei ne’e baixa ona. Ita fahe ba prezidente komisaun espesializada sira no favór halo favór servisu ba,” Deputadu Luis Roberto anunsia hafoin submete tiha proposta ne’e ka KEP sira.

Komisaun Espesializada Permanente (KEP) iha Parlamentu Nasionál hamutuk hitu (7) mak hanesan Komisaun A mak trata asuntu Justisa no Konstitusionál, Komisaun B trata asuntu Negósiu Estranjeiru, Defeza no Seguransa, Komisaun C mak trata asuntu Finansa Públika.

Nune’e mós Komisaun D mak trata asuntu Ekonomia no Dezenvolvimentu, Komisaun E mak trata asuntu Infraestrutura, Komisaun F mak trata asuntu Saúde, Seguransa Sosiál  no Igualdade Jéneru no ikus liu mak Komisaun G ne’ebé trata asuntu Edukasaun, Juventude, Kultura no Sidadania.

Iha loron 15 outubru 2020, Governu liuhosi Ministériu Finansa (MF) aprezenta ona proposta-lei Orsamentu Jerál Estadu (OJE) 2021 ho montante biliaun $1.895 ba Parlamentu Nasionál (PN).

Proposta OJE 2021 hamutuk biliaun $1.895 komposta hosi saláriu no vensimentu millaun $ 239,26, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Dokumentasaun orsamentál sira-ne’ebé Governu aprezenta ba Parlamentu Nasionál mak hanesan livru 1 (panorama orsamentál), livru 2 (planu anuál), livru 3-A (fundu infraestrutura), livru 3-B (munisípiu sira), livru 3-C (RAEOA-ZEESM), livru 4-AB (rúbrika orsamentál), livru 5 (parseiru dezenvolvimentu) no livru 6 (fundu espesiál-FDCH).

Iha aprezentasaun proposta-lei OJE 2021 ne’e aprezenta hosi Ministra Finansa Ein-Ezersísiu atuál Vise-Ministra Finansa, Sara Lobo Brites no akompaña hosi Ministru Asuntu Parlamentár no Komunikasaun Sosiál, Francisco Jerónimo.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here