Igreja Katólika kontinua apela oinsá sosiedade Timor-Leste atu kuidadu no labele soe bebé. Meius sosializasaun Igreja nian ne'e monta espanduk iha edifísiu Komisaun Justisa no Pás, Igreja Katedrál Dili. Imajen Tatoli/Dok.Eugénio Pereira

DILI, 26 outubru 2020 (TATOLI)- Komandu Polísia Munisípiu Dili detein ona inan ida ne’ebé deskonfia soe nia bebé ho kondisaun sei moris.

Notísia Relevante : Ema soe bebé ida ho kondisaun asu han tiha ona isin lolon

Portavós Komandu Jerál PNTL, Superintendente Xefe, Arnaldo de Araújo, informa katak, parte sasin balun hetan bebé ne’ebé nia inan ida soe iha área Vila-Verde, Dili, ho kondisaun bebé sei moris no lori kedas ba hala’o tratamentu iha Ospitál Nasionál Guido Valadares (HNGV).

Kazu soe bebé ne’e akontese iha sábadu (24/20), tuku 22:00 Otl,  ne’ebé família balun konsege hetan no salva bebé ne’e.

“Bebé ne’e ema soe iha área Vila-Verde nian ho kondisaun sei moris hela no agora hala’o tratamentu saúde iha ospitál no bebé nia inan polísia kaptura kedas lori ba halo tratamentu saúde no sai ona ba uma mahon balun,” hateten portavós PNTL, Superintendente Xefe, Armando de Araújo, ohin, ba jornalista iha Komandu Jerál PNTL, Caicoli, Dili.

Notísia Relevante : Kazu Soe Bebé, TDD Aplika Pena Prizaun Tinan-Haat ba Arguida Erlinda Barros

Portavós PNTL ne’e hatutan, parte Servisu Informasaun Polísia (SIP) no ekipa Investigasaun Kriminál Dili halo hela investigasaun ba suspeitu ida ka mane  ne’ebé deskonfia durante ne’e moris hamutuk ho inan ne’e to’o gravida.

Parte PNTL mós sei koopera ho Uma Mahon sira hodi rekolla dadus loloos kona-ba razaun inan ne’e soe ninia bebé.

Tuir rezultadu investigasaun PNTL nota kazu soe bebé durante ne’e akontese maka’as iha Dili no maioria bebé sira ne’ebé ema soe hetan ho kondisaun mate. Tanba ne’e,  ba kazu ida-nee foin primeira vés bebé ho kondisaun moris.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here