Vise Prezidente Parlamentu Nasionál, Maria Angelina Sarmento. Imajen/Egas Cristovão

DILI, 26 outubru 2020 (TATOLI)—Parlamentu Nasionál apresiza governu  nia intervensaun ba atividade negósiu ne’ebé lokaliza iha resintu semitériu Santa Kruz nian tanba oras ne’e laiha ona atividade negósiu iha fatin refere.

Notisia Relevente: PN husu Governu interven atividade negósiu iha Semitériu Santa Kruz

“Ha’u hakarak fó agradesimentu ba Governu tanba kestaun ne’ebé ha’u foti iha plenária semana kotuk kona-ba ema-ne’ebé halo negósiu hodi fa’an hahan tasak iha semitériu Santa Cruz, Governu konsege atua no ha’u haree fatin ne’ebá komesa moos,” Vise-Prezidente Parlamentu Nasionál, Deputada Maria Angelina Lopes Sarmento, hato’o apresiasaun ne’e liuhosi plenária PN, segunda ne’e.

Deputada Partidu Libertasaun Populár ne’e subliña, resintu semitériu Santa Cruz la’ós bandu ema atu halo negósiu maibé fatin apropriadu mak la’ós iha semitériu Santa Cruz.

“Ne’eduni Governu atua ona no husu Governu atu-bele identifika fali fatin ida apropriadu atu sira bele halo sira-nia negósiu ho modelu hanesan ne’e,” nia hateten.

Iha loron 19 outubru 2020 liubá, Vise-Prezidente Parlamentu Nasionál, Deputada Maria Angelina Lopes Sarmento, husu Governu atu halo intervensaun lalais ba atividade negósiu iha resintu semitériu Santa Kruz tanba konsidera estraga estéstika nasaun nian.

“Ha’u lamenta tebes. Governu presiza lalais atu halo intervensaun ruma ba semitériu Santa Kruz, fatin ne’ebé istóriku, movimentu manifestasaun 12 novembru akontese iha-ne’ebá maibé agora loro-loron ita haree grupu balun ka ema na’in-hitu ka na’in-ualu ba halo negósiu hodi fa’an hahan tasak iha semitériu nia oin. Ne’e ita haree ladi’ak ba ita-nia estéstika nasaun nian”, Deputada Partidu Libertasaun Populár ne’e levanta liuhosi plenária, Parlamentu Nasionál segunda, semana kotuk.

Tuir observasaun Agência TATOLI ba iha semitériu Santa Cruz laiha ona atividade negósiu iha fatin refere no parte autoridade munisípiu Dili kada loron halo hela monitorizasaun ba fatin refere.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here