Prezidente Repúblika, Francisco Guterres Lú Olo, Prezide Reuniaun Konsellu Estadu iha Palásiu Prezidente Nicolau Lobato, Bairru Pite, Dili, segunda, (26/10). Imajen tatoli /Egas Cristovão

DILI, 26 outubru 2020 (TATOLI)—Konsellu Superiór Defeza no Seguransa no Konsellu Estadu ho unanimidade husu Prezidente Repúblika, Francisco Guterres ‘Lú Olo’, haruka mensajen ba Parlamentu Nasionál atu fó autorizasaun ba deklarasaun estadu emerjénsia tuir pedidu hosi Governu ba loron tolu nulu.

Hafoin reuniaun Konsellu Superior Defeza no Seguransa no Konsellu Estadu ne’ebé prezide hosi Prezidente Repúblika,  Xefe Casa Militár Coronél António Soares da Silva “Mau-Kalo” informa hosi Konsellu rua ho unanimidade husu Prezidente Repúblika atu estende nafatin estadu emerjénsia.

Prezidente Repúblika, Farncisco Guterres ‘Lú Olo’ sei haruka mensajen ba Parlamentu Nasionál husu autorizasaun molok deklara estadu emerjénsia.

Xefe Casa Militár ne’e hateten, Timor-Leste nu’udar país ne’ebé ki’ik ho kondisaun infraestrutura ho rekursu ne’ebé sei menus, tanba ne’e ai-moruk ida ne’ebé di’ak liu ba kombate coronavirus (COVID-19) mak prevensaun.

Pedidu Governu ba estensaun estadu emerjénsia ninian tanba haree ba evolusaun preokupante ba situasaun epidemiolòjika no proliferasaun kazu rejistadu ho COVID-19 ne’ebé aumenta iha nível rejionál no nível mundiál.

Governu hato’o pedidu ba Prezidente Repúblika atu halo renovasaun ba estadu emerjénsia tanba periódu loron tolu-nulu (30) estadu emerjénsia ba daneen, hahú husi 05 outubru 2020 no sei termina iha 03 novembru 2020.

Timor-Leste rejista kazu pozitivu ho COVID-19 na’in-ida (1) desde 21 marsu 2020 to’o ohin loron, ema na’in-28 rekuperadu no laiha ema ida mak mate.

Hafoin Timor-Leste rejista kazu pozitivu COVID-19 na’in-ida, iha 23 marsu 2020, Konsellu Ministru aprova pedidu ida atu husu Prezidente Repúblika deklara estadu emerjénsia. Hafoin rona Konsellu Superior Defeza no Seguransa no Konsellu Estadu, iha 25 marsu 2020, Prezidente Repúblika hakerek karta ba Parlamentu Nasionál husu autorizasaun atu deklara Estadu Emerjénsia. Iha loron 27 marsu, Prezidente Repúblika deklara estadu emerjénsia ba períodu loron-30.  Desde fulan marsu 2020, Estadu Timor-Leste deklara ona estadu emerjénsia ba daneen.

Moras coronavirus (COVID-19) nu’udar kazu importadu tanba ne’e Governu hasai medida forte ba periódu estadu emerjénsia ne’ebé hahú 05 outubru, katak sira ne’ebé sai-tama Timor-Leste la kumpre regra sei selu multa entre $30-$250 no tenke selu rasik sira-nia kuarentena.

Governu implementa medida prevensaun liuhosi selu multa ba sira ne’ebé la kumpre regra tanba númeru sidadaun sira halo pasajen ilegal iha fronteira terreste aumenta. Tama no sai ilegalmente mai territóriu nasionál bele lori risku ba propagasaun moras coronavirus (COVID-19) iha komunidade nia leet.

Komunikadu Imprensa

 

 

HAKEREK NO HATÁN

Please enter your comment!
Please enter your name here