Ofisiail Funsionariu husi Ministeriu Solidaderidade kontinua atende no halao pagamentu subsidiu $200 ba komunidade sira. Imajen/Antonio Goncalves

DILI, 26 outubru 2020 (TATOLI)—Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten pagamentu ba reklamante sira ne’ebé mak la realiza ohin (26/10/2020) ne’e tanba mosu failansu tékniku hodi adianta pagamentu ba benefisiáriu sira.

Notisia Relevante:  Segunda semana oin, Governu sei halo pagamentu subsídiu $200

“Ita labele realiza pagamentu ba reklamante hamutuk 2.909 tanba mosu failansu tékniku. Tanba ita iha prosesu faze tranzisaun Dotasaun Orsamentál Temporária (DOT) ba Orsamentu Jerál Estadu (OJE) entaun provizoriamente Ministériu Finansa  labele funsiona hodi halo tranferénsia osan ba konta bankária suku sira-nian,” dehan Diretór MSSI, Rui Manuel Gago Exposto, ba Agência TATOLI iha nia knaar fatin MSSI, Caicoli, Dili, segunda ne’e. 

Tanba tuir nia katak DOT funsiona to’o fulan 10 maibé bainhira Prezidente Repúblika promulga ona no bainhira sistema la’o loos ona mak MF sei halo transferénsia osan ba konta bankária suku nian.

“Ita hala’o DOT durante fulan 10 bainhira ita-nia Prezidente Promulga ona OJE iha 19 outubru 2020 mak sistema tenke taka ona hodi fó biban ba MF atu ajusta orsamentu. Tanba ne’e, hein katak iha tempu badak bele realiza pagamentu ne’e,” nia dehan. 

Ho failansu tékniku ne’e, Rui Exposto husu deskupla ba benefisiáriu sira ne’ebé mak naran taka sai tiha ona iha suku maibé hein katak iha tempu badak MSSI sei realiza pagamentu ne’e.

“Espera katak iha tempu badak, Governu liuhosi MSSI bele realiza ona pagamentu ba reklamanet ka benefisiáriu sira,” nia esplika.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here