Diretór IFFS, Padre Manuel Pinto, SDB. Imajen TATOLI/Domingos Piedade Freitas.

DILI, 26  outubru 2020 (TATOLI)—Institutu São Francisco de Sales (IFFS), Don Bosco, Comoro, Díli, sei hala’o graduasaun dahuluk ba estudante finalista hosi fakuldade filozofia hamutuk na’in-27 iha loron 31 fulan outubru tinan ne’e.

Diretór IFFS, Padre Manuel Pinto, SDB, hateten dezde ezisténsia Institutu São Francisco de Sales (IFFS) iha tinan 2012 hahú ho estudante na’in-46 no ikus mai na’in-27 mak konsege konklui sira-nia estudu hodi hakat ba graduasaun.

“Graduasaun dahuluk iha Institutu São Francisco de Sales sei realiza iha loron 31 outubru 2020 ba estudante finalista na’in-27. Ezisténsia Institutu São Francisco de Sales (IFFS) iha tinan 2012 hahú ho estudante na’in-46 no ikus mai na’in-27 mak konsege konklui sira-nia estudu hodi hakat ba graduasaun,” Padre Manuel Pinto hateten ba Agência TATOLI iha nia serbisu fatin Comoro, Dili, domingu ne’e.

Diretór ne’e esplika, hosi ema na’in-27 ne’e inklui mós irmaun relijiozu na’in ha’at maibé sira sei la marka prezensa fízika tanba oras-ne’e daudaun sira hala’o hela sira-nia estudu iha rai liur mak na’in-rua (2) iha Filipina no na’in-rua (2) iha Austrália.

Padre Manuel konsidera serimónia graduasaun ne’e nu’udár orgullu ida ba Kongregasaun Salesiana no ba IFFS rasik, tanba durante tinan ualu nia laran luta makaas to’o prenxe rekézitu hotu no konsege hetan despaixu hosi Ministériu Ensinu Superiór Siénsia no Kultura atu bele realiza graduasaun.

“Ami kontente tebe-tebes tanba graduadu sira, barak mak serbisu ona liu-liu ba hirak ne’ebé husik dalan vokasaun nai lulik nian, no sira ne’ebé kontinua formasaun oi-oin hanesan hala’o estájiu iha Portugál, balun estájiu iha Austrália no balun iha Filipina,” diretór ne’e espresa ninia sentimentu kontente.

Padre Manuel Pinto esplika objetivu hosi ezisténsia IFFS katak eskola ne’e loke ho objetivu atu fó formasaun ba relijiozu sira, ne’eduni númeru estudante la’ós barak liu hanesan universidade sira seluk.

“Totál estudante naun ativu ne’ebé kontinua hala’o sira-nia teze hamutuk ho sira-ne’ebé ativu hamutuk na’in-108, kompostu hosi relijiozu no leigu sira,” nia hateten.

Ho ezisténsia IFFS, nia hatutan, relijiozu sira hamutuk na’in-ualu (8) ona mak konsege hala’o sira-nia formasaun iha ne’e no hala’o sira-nia ordenasaun diakonál iha rai liur.

“Tinan oin, IFFS sei loke tan oportunidade ba leigu sira, balun hahú ona iha tinan ne’e ho programa foun kona-ba edukasaun téknika la’ós edukasaun formal. Tanba, eskola únika ne’ebé halo ninia formasaun téknika mak iha Fatumaca, Fuiloro, Maliana no Dili. Ho ida-ne’e mak kongregasaun hanoin atu prepara rekursu umanu ba eskola téknika sira, inklui ba entidade sira seluk,” nia esplika.

Entretantu, oras ne’e daudaun, totál dosente iha IFFS hamutuk na’in-23, balun iha rai laran no balun mai hosi rai liur hanesan universidade pontífise salesiana, Roma no Bélgika.

Jornalista: Domingos Piedade Freitas

Editór: Câncio Ximenes

HAKEREK NO HATÁN

Please enter your comment!
Please enter your name here