Prezidente interinu AEMTL, Teresa de Fátima Gonçalves no Diretór Ezekutivu IADE, Filomeno Belo, asina akordu kooperasaun. Imajen Tatoli/Antónia Gusmão

DILI, 26 outubru 2020 (TATOLI)--Institutu Apoiu Dezenvolvimentu Emprezariál (IADE) no Asosiasaun Emprezariál Feto Timor-Leste (AEMTL, sigla portugés) selebra akordu ida ho durasaun tinan-lima hodi kapasita feto emprezária sira iha área negósiu.

Akordu ne’e asina hosi Prezidente interinu AEMTL, Tereza de Fátima Gonçalves no Diretór Ezekutivu IADE, Filomeno Belo, iha salaun enkontru asosiasaun emprezariál, Akait.

“Objetivu hosi akordu ne’e atu koopera di’ak liután no tulun ita-nia emprezária feto sira, nune’e bele susesu liután iha futuru. Tanba ne’e ita sei realiza atividade formasaun ba negósiu no apoiu tékniku,” Diretór Ezekutivu IADE relata hafoin asina akordu, segunda ne’e.

Notísia Relevante: IADE-BNCTL Selebra Ona Akordu Fasilita Kréditu ba Kliente ne’ebé Tuir Formasaun Emprezariál

Tuir Dirijente ne’e, institutu kapasita ona emprezária feto balun iha área negósiu ho susesu liuhosi programa kompetisaun negósiu inovativu iha tinan kotuk.

IADE-AEMTL selebra akordu, segunda (26/10), iha salaun enkontru asosiasaun emprezariál, Akait. Imajen Tatoli/Antónia Gusmão

Fundu ba formasaun no atividade seluk ne’e mai hosi apoia kooperasaun, tanba ne’e, Filomeno Belo iha esperansa hosi akordu ne’e bele fó benefísiu di’ak ba feto emprezária liuhosi formasaun.

Iha fatin hanesan, Vise-Prezidente AEMTL, Carme da Silva, hateten programa ne’ebé atu implementa liuhosi akordu ne’e integradu tanba la’ós de’it fó formasaun maibé mós halo monitorizasaun nune’e benefisiáriu sira bele kreativu halo planu negósiu.

Nia hatutan, ba grupu ne’ebé hetan ona formasaun tenke iha planu negósiu aliñadu ho kritéria banku, nune’e bele hetan asesu kréditu.

“Ami hakarak formasaun ne’e iha rezultadu konkretu, tanba atividade la’ós formasaun de’it maibé bele apoia negósiu no asesu ba finansiamentu atubele implementa buat ne’ebé mak sira iha no iha tempu hanesan durante implementasaun negósiu IADE sei akompaña nafatin atu hadi’a di’ak liután negósiu,” Vise-Prezidente asosiasaun ne’e esplika.

Iha ámbitu asina akordu ne’e partisipa hosi reprezentante Ministériu Turizmu, Komérsiu no Indústria (MTKI), Ministériu Koordenadór Asuntu Ekonómiku (MKAE), reprezentante Nanco Central de Timor-Leste (BCTL), inklui parseiru Dezenvolvimentu sira.

Jornalista: Antónia Gusmão

Editora: Julia Chatarina 

HAKEREK NO HATÁN

Please enter your comment!
Please enter your name here