Logotipu TDD. Imajen Tatoli/Egas Cristóvão

DILI, 26 outubru 2020 (TATOLI)-Arguidu JR, ohin, tenke ba  tur iha sala audiénsia julgamentu Tribunál Distritál Dili (TDD) hanesan arguidu  hodi hatán ba nia aktu  ne’ebé halo agresaun fisku hasoru lezadu JD  relasiona ho kazu hadau-malu rai.

Tuir faktu  ne’ebé arrola hosi Ministériu Públiku (MP) katak, iha loron 15 agostu 2019, purvolta   tuku 10:00  Otl, iha area Masin Lidun, Tasi Tolu, Dili, arguidu JR  hamutuk ho ema seluk ne’ebé lezadu la koñese ba sukat lezadu nia rai iha fatin ne’ebá.

Depois lezadu hasé arguidu dehan “Imi hela iha Manleuana, nusa imi mai sukat fali ha’u nia rai iha ne’e.”

Rona tiha lezadu nia ko’alia ne’e, arguidu halai kedas ba lezada hodi tuku dala-lima tuituir malu, kona iha lezadu nia hasan loos dala ida, kona iha tilun hun parte loos, kona iha reen-toos, hasan ho iha kotuk laran, hodi rezulta lezadu monu ba rai.

Halo tiha agresaun fizika hasoru lezadu, arguidu kontinua hamutuk ho ninia ema hodi sukat no okupa lezadu nia rai.

Konsekuénsia hosi arguidu konduta ne’e, rezultadu moras no bubu-metan iha lezadu nia isin lolon no lezadu lakon nia rai tanba arguidu okupa.

Arguidu komete aktu ne’e ho forma livre, deliberada no konsentimentu no arguidu hatene katak hahalok ne’e proibidu no hetan punisaun tuir lei penal, maibé nia kontinua pratika asaun ne’e.

Arguido  hanesan autór-material, forma konsumada ba krime ofensa  integridade fízika simples no  uzurpasaun de imóvel, p.e.p pelo art. 145 e art 261 do Código Penal.

Hatán ba akuzasaun ne’e, arguidu nega hotu faktu ne’e laloos katak nia parte la baku lezadu. Maibé lezadu hateten, arguidu baku duni nia, no rai ne’e tuir dokumentu própriu ba rai Estadu nian ne’ebé atribui ba  igreja.

Rona tiha parte sira tama kedas ba iha alegasaun, MP  no defeza husu  Tribunál aplika justisa ba arguidu ho tribunál nia konviksaun.

Tribunál adia fila-fali julgamentu  ba iha loron 11 novembru, tinan ne’e, iha tuku 09:00 Otl.

Audiénsia julgamentu ne’e prezide hosi juis singular, Maria Solana, MP reprezenta prokuradór, Jacinto Babo, arguidu hetan asisténsia legal hosi Defensór Públiku, Afonso de Jesus.

Estajiáriu   : Duarte da Costa

Editór        : Francisco Simões

HAKEREK NO HATÁN

Please enter your comment!
Please enter your name here