Imajen/Doc. TATOLI

DILI, 26 outubru 2020 (TATOLI)—Bankada Frente Revolusionária Timor-Leste Independente (FRETILIN) kontinua propoin ba VIII Governu Konstitusionál atu revee Planu Estratéjiku Dezenvolvimentu Nasionál (PEDN) tanba meta barak ulrapasadu.

Notisia Relevante: Aniceto Guterres husu revee PEDN

“Dala ida tán FRETILIN propoin ba VIII Governu konstitusionál atu revé Planu Estratégiku Dezenvolvimentu Nasionál, tanba meta barak tebes mak governu anteriór la tau prioridade, ohin loron ultrapassadu hotu ona,” Reprezentante Bankada FRETILIN, Deputadu Dário Madeira hato’o deklarasaun polítika ne’e liuhosi plenária Parlamentu Nasionál, segunda ne’e.

Bankada FRETILIN konsidera dékada ida resin gasta osan biliaun $14 maibé meta sira iha PEDN la atinje.

“Haree took mós ba veteranu ho nia oan sira-nia kondisaun moris, hanesan veteranu 24 anos Salvador da Silva “Salarubi” ne’ebé tuku lata hodi hatutan moris. Ida-ne’e mak rezultadu ukun dékada ida resin. Haree took mós ba estudante sira-nia kondisaun eskola, livru, haris-fatin no bee-moos,” bankada FRETILIN refere iha deklarasaun polítika.

Reprezentante Bankada FRETILIN ne’e hateten, PEDN 2011-2030 defini katak iha 2015 konstroi no reabilita ona edifísiu pré-eskolár 253 ho sala aula hamutuk 758.

“Konstroi no reabilita ona edifísiu ensinu sekundáriu 64 ho sala aula 1.280. Tinan 2015 labarik sira ho defisiénsia liu 40% mak asesu ba ensinu báziku iha ne’ebé,” Bankada FRETILIN fundamenta.

Bankada FRETILIN husu haree took Hospital Nacional Guido Valadares (HNGV) no referál sira, kliníka no postu saúde sira, médiku, enfermeiru no parteira sira-nia kondisaun serbisu.

“Ne’ebé tuir PEDN 2011-2030 define katak iha 2015 Estadu regula ona serbisu saúde hosi fornesedór privadu sira no setór naun-lukrativu, tuir sistema saúde públiku nian. Katak to’o 2015 garante ona ezisténsia no jestaunn apropriadu ba transporte inklui ambulánsia no karreta multi-funsaun. To’o 2015 65% inan tuur-ahi hetan atendimentu hosi profisionál saúde sira no 90% edifísiu saúde nian asesu ona ba eletrisidade, bee-moos no saneamentu báziku. Iha ne’ebé,” Deputadu Dário Madeira hateten.

Bankada FRETILIN afirma, loloos ne’e CNRT apoia VIII Governu hodi konklui meta PEDN 2011-2030 tanba planu refere Governu CNRT mak harii no defini meta sira, aprova osan boboot maibé la implementa.

Entretantu Deputadu bankada CNRT, Deputadu Arão Noé de Jesus da Costa Amaral, hateten durante tinan 10 iha buat barak mak hatudu ona.

“Sé ita loke fali gravasaun iha parlamentu ida-ne’e iha 2009 no 2010 kuandu diskute Projetu Eletrifikasun Nasionál (PIN) ita hotu-hotu hatene, agora ita ko’alia mak suku no aldeia balu ahi seidauk kobre. Ha’u hanoin ida-ne’e ita presiza agradese,” nia dehan.

Deputadu Arão Noé hatutan, rezultadu osan empréstimu mak uza ba estrada sira iha territóriu nasionál no Estrada sira iha Dili laran tanba meta sira hosi PEDN ne’e.

“Tanba ne’e Governu foun ne’ebé mai tenke kontinua de’it, nia sei la sobu projetu sira tuan hodi halo fali foun, ne’ebé ha’u husu ita hotu-hotu rekoñese katak saida ihaa ita hala’o,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here