Feto Timor-Leste ne’ebé sai manan-na’in ba Prémiu Maha Cakri Nu’udar Profesora Inspiradora hosi Eskola Bazika Filial Matata, Railaco, Ermera,, profesora Lurdes Rangel Gonçalves. Imajen/UNICEF.

DILI, 26 outubru 2020 (TATOLI)—Embaixada Real Thailandia iha Timor-Leste hamutuk ho Fundasaun Prémiu Princesa Maha Cakri realiza konferénsia virtuál ba Prémiu Maha Chakri ba datoluk iha Timor Plaza, Dili, Timor-Leste, ne’ebé aprezenta profesór/a manan-na’in sira hosi nasaun Sudueste Aziatiku hodi fahe sira-nia esperiénsia kona-ba metódu hanorin ne’ebé susesu hodi inspira estudante sira iha sira-nia estudu no atividade eskola nian.

Notisia Relevante: Embaixada Tailándia realiza konferénsia virtuál ba prémiu Maha Chakri

Iha sesaun plenária ne’e, feto Timor-Leste ne’ebé sai manan-na’in ba Prémiu Maha Cakri Nu’udar Profesora Inspiradora hosi Ensinu Bazika Filial Matata, Railaco, Ermera, profesora Lurdes Rangel Gonçalves, hateten dezafiu nuda’ar manorin-na’in sempre iha maibé tenke tuir kedas ho solusaun no hosi solusaun ne’ebé di’ak bele atinje rezultadu ne’ebé di’ak.

Profesora Lurdes esplika, rezultadu ne’e bazea ba ninia rezultadu hanorin estudante sira mak ohin loron nia bele manan Prémiu Maha Chakri Sirindorn iha tinan 2019, ne’ebé ho kontribuisaun bo’ot hodi muda estudante sira-nia moris, hametin no inspira estudante sira hodi estuda iha nasaun rasik.

Konferénsia virtuál ba Prémiu Maha Cakri ba datoluk iha Timor Plaza, Dili, Timor-Leste, ne’ebé aprezenta profesór/a manan-na’in sira hosi nasaun Sudueste Aziatiku. Imajen/Espesial.

“Agora ita tenke define dezafiu nuda’ar manorin hasoru labarik ne’ebé maka ho kárater ne’ebé la hanesan. Entaun, hanesan manorin, ha’u presiza hatene sira-nia kárateristíka ida-ida. Ezemplu, iha klase ida estudante hamutuk na’in-42, hosi sira na’in-42 ne’e, ha’u tenke hatene sira-nia kárater ida-idak,” dehan manan-na’in ba Prémiu Maha Chakri Nu’udar Profesora Inspiradora,  Lurdes Gonçalves, ba Agência TATOLi, foin lalais ne’e.

Profesora Lurdes konsidera maneira hanorin iha ensinu bázika la hanesan ho nivél universidade tanba primária mak baze ba estudu hotu-hotu.

“Ita labele hanorin labarik ki’ik ho nivél aas demais ho sériu no dalaruma ita tarata labarik sira, hirus labarik sira, ida ne’e fó presaun ba labarik  no halo labarik nunka besik ita,” nia dehan.

Tanba ne’e, nia konsedera katak “aprende ho livre” nuda’ar metodu di’ak ida atu atrai labarik sira-nia vontade hodi aprende.

“Ha’u-nia parte importante tebes atu estudante sira bele hatán ba pergunta ne’ebé iha ho livre. Tanba ne’e,  metodu hanorin tenke di’ak hodi atrai  labarik sira katak halimar maibé siénsia mós la’o daudaun hodi nune’e sira bele sente laiha presaun no livre hodi aprende ho laran no hatan ba pergunta saida mak iha,” nia dehan.

Atu hatene bainhira labarik ida komprende kona-ba materia ka diskusaun ruma, nia haktuir, tenke liuhosi rezultadu no rezultadu ida-ne’ebé mai hosi diskusaun no interasaun di’ak no livre iha aula laran, atu sira labele tauk hodi hato’o sira-nia idea ka pergunta no resposta.

“Entaun aula ida ha’u hanorin ne’e, aula metodólojia partisipativu ka atrativu, dinámiku no inovativu. Katak, aleinde observa atu hatene katak labarik sira komprende ne’e só iha grupu diskusaun no iha ne’ebá hatudu rezultadu ruma, nune’e ita hatene katak labarik sira-ne’e komprende no hatene,” Profesora Lurdes hateten.

Nia esplika, ambiente eskola ne’ebé moos ajuda mós prosesu aprendizajen labarik sira-nian iha eskola. Atu realiza ida-ne’e, tenke iha mós involvementu inan-aman no parte hotu nian tanba siénsia bele la’o maibé etíka no saúde mós tenke la’o hanesan.

“Ita tenke hadomi ambiente eskola, tenke halo moos no atrai labarik sira no eskola sira presiza iha jardim da eskola. Ami koopera ho inan-aman sira, ho xefe aldeia no mós igreja, bainhira atu halo lutu eskola nian ruma, iha organizasaun APP maka mai halo no avizu ruma kona-ba hadia no hamoos eskola, dalaruma sempre fó sai liu hosi avizu igreza nian atu nune’e inan-aman sira iha posibilidade bele partisipa mós,” profesora ne’e hateten.

Ho nune’e, profesora Lurdes hateten, métodu no esperiénsia sira ne’ebé nia iha, nia fahe hamutuk ho profesora no mós estudante sira atu dezenvolve eskola ne’e ho diak liután. Entaun, tuir nia, hosi buat sira-ne’e hotu nia aplika iha eskola no estudante sira iha mudansa duni tuir observasaun hosi Ministériu Edukasaun ne’ebé serbisu hamutuk ho Organizasaun Maha Chakri, nune’e lori nia ba hetan Prémiu Maha Chakri iha tinan 2019 nu’udar profesora inspiradór ba labarik sira.

Tuir profesora ne’e hateten, rezultadu di’ak ba nia mak susesu nu’udar profesora hodi lori nia estudante hodi akaba sira-nia estudu iha sestu klase.

“Resultadu di’ak. Ha’’u fila hosi kurríkulu no ha’u fila ba eskola, ha’u koko hanorin estudante klase rua to’o tolu no lori sira to’’o klase ne’en. Nia objetivu mak ha’u tenke hanorin uluk atu ha’u bele sente kuríkulu nia todan ne’e iha ne’ebé no kmaan iha ne’ebé, nune’e sai hanesan referénsia ida ba ha’u. Nune’e, iha profesór seluk ne’ebé mak iha difikuldade kona-ba ida-ne’e, ha’’u mós bele ajuda tanba ha’u iha espériensia ona,” nia hateten.

Hafoin simu tiha prémiu Maha Chakri iha tinan 2019, profesora Lurdes Gonçalves iha aspirasaun ne’ebé la sees hosi programa ne’ebé nia iha on, katak lakohi nia estudante sira atu falta koñesimentu ba lingua inglés nune’e mós ba teknolojia moderna sira.

“Hau lakohi ha’u-nia estudante sira atu la hatene Inglés, hau lakohi sira la konese teknolia modern, tanba ne’e agora tempu ona atu koopera ho ministériu edukasaun no parseiru bele  oferese buat ne’ebé di’ak ba sira atu aprende atu sira labele hela iha fatin de’it. Ha’u mós hakarak halo komunidade aprendizajen liuhosi apoiu orsamentu ne’ebé UNICEF apoiu ba ha’u ho montante $10.000, entaun ha’u fó apoiu ba sira iha prosesu aprendijazen ne’e,” nia dehan.

Journalista: Nelia Borges

Editór: Cancio Ximenes

HAKEREK NO HATÁN

Please enter your comment!
Please enter your name here