Diretór ETI Dionísio Ximenes, hamutuk ho ninia estudante sira halo hela esplikasaun kona-ba aplikasaun durante espozisaun iha CCD, Dili.Imajen/Tome Amado.

DILI, 26 outubro 2020 (TATOLI)—Estudante Departementu Tékniku Linguazen no Programasaun Eskola Teknika Informátika Dili (ETI), daudaun ne’e hamosu ona programa aplikasaun android  foun ida ne’ebé bele deteta paraderu transporte hanesan karreta no motor hafoin mosu asidente tráfegu maibé motorista sira halai lakon tanba lakohi responsabiliza.

Diretór ETI Dionísio Ximenes, konsidera aplikasaun ne’e importante atu tulun servisu Polisia Nasionál Timor-Leste liliu Unidade Tránzitu hodi deskobre autór ba kazu asidente tráfegu sira tanba iha aplikasaun ne’e instala ona dadus kompleta kona-ba transporte ne’e inklui se mak na’in ne’ebé antes ne’e  rejistu ona iha Diresaun Nasionál Transporte no Terrestre (DNTT).

Notísia Relevante :ETI implementa zero toleránsia ba fuma sigaru

“Ita-nia polisia bele hatene kedan karreta ne’e se mak lori, karreta na’in mak se depois diresaun karreta ne’e husi ne’ebé kompletu kedan ne’e duni Polisia la presiza atu husu tan dadus ba DNTT maibé ita-nia polisia bele identifika rasik ona problema sira ne’e,” nia informa ba Agência Tatoli, iha Sentru Konvensaun Dili (CCD-sigla portugés), segunda ne’e.

Estudante finalista sira hamosu aplikasaun foun ne’e bainhira halo estájiu iha DNTT durante fulan ida ho objetivu atu kompleta ezame prova aptidaun profesionál (PAP).

“Razaun bainhira kondutór sira ho karreta  xoke ema mate, ka karreta bakufila, husi Polisia sempre mai husu dadus ba DNTT atu fasilita servisu polisia nian atu halo identifikasaun,  entaun mosu inisiativa ida ne’e husi estudante ETI rasik atu kontribui sistema ida ne’e hodi ajuda polisia sira,” nia esplika.

Iha fatin hanesan programadór atuál estudante  finalista ETI, Denilson Pedro da Resuricão de Sousa, informa sira dezenu aplikasaun foun ne’e tanba hakarak fasilita servisu PNTL ninian iha terrenu tanba durante estájiu fulan ida nota PNTL sempre enfreta dadus bainhira akontese asidente tráfegu iha estrada públiku no dala barak susar atu deskobre paraderu motorista sira nian tanba halai lakon.

“Entaun ami kria aplikasaun ida ne’e maibé ninia dadus foti husi DNTT atu ajuda polisia bele deteta karreta ida bainhira seidauk halo inspesaun ka ninia KIR mate ou karik xoke ema mate ka fakar ema depois halai tiha polisia la presiza tan husu ba DNTT maibé foti de’it xapa matríkula dadus hotu kompletu ona,” nia esplika.

Nia parte prontu atu entrega ba Governu liliu instituisaun PNTL atu uza bainhira iha nesesáriu.

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here