Imajen/SAS Timor-Leste.

DILI, 26 outubru 2020 (TATOLI)–Impaktu hosi bailoron naruk halo komunidade sira iha Aldeia Ossoluga, Sorulai no Aldeia Festau, Suku Samalari, Postu Administrativu Baucau-vila, Munisípiu Baucau, susar asesu ba bee-moos.

“Problema ba ita mak bailoron naruk halo bee-moos menus no komunidade susar atu asesu bee-moos. Entaun, komunidade obrigadu tenke la’o kilo ida-rua mak bele asesu ba bee-moos,” Xefe Suku Samalari, Sorteiro Magno Siqueira, ba Agência TATOLI via telefónika, segunda ne’e. .

Nia hatutan, nu’udar xefe suku halo ona esforsu barak no Konsellu Suku (KS) halo planu hakarak halo perfurasaun hodi aumenta débitu bee-moos nune’e komunidade bele asesu ho di’ak maibé labele akontese tanba diferensa ideia ho komunidade hosi Suku Samalari rasik.

“Ita labele realiza ita-nia planu perfurasaun maibé adianta fali ba tinan oin mak bele realiza. Tanba, ita hakarak ita-nia povu livre hosi nesesidade bázika sira hanesan bee-moos, estrada, eletresidade, edukasaun no saúde. Ita mós hakarak atinje ita-nia meta ba programa bázika sira maibé sempre fó presaun ba ita,” nia dehan.

Tanba, nia dehan, realidade ne’ebé mak parte kompetente halo viabilidade ba fatin refere katak bee ne’e sei garante ba tinan naruk maibé hahalok no evulusaun ema-nian bee komesa menus bainhira bailoron naruk tanba laiha aihun ne’ebé tahan bee-matan.

“Ho ida ne’e mak ami husu ba Governu liuhosi Minsitériu Agrikultura no Peska (MAP) atu ajuda fó ami ai-oan atu ami kuda no tahan netik rai halai no bee-matan hodi labele halo bee menus,” nia husu. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here