DILI, 26 outubru 2020 (TATOLI) – Asidente tráfegu entre karreta no motór ne’ebé akontese iha área Akadiru-Laran, Manleuana, Postu Administrativu Metinaro, Munisípiu Dili, domingu kalan (25/10), purvolta tuku 20:00 Otl, rezulta Joana Francisca Maia, tinan 24, mate fatin no Thomas Quino Gusmão, sofre kanek grave, hala’o hela tratamentu intensivu iha Ospitál Nasionál Guido Valadares (HNGV).
Matebian Joana Francisca Gusmão ho nia kaben Thomas Aquino Gusmão, kondús motór Honda Beat kór metan xapa matrikula O-4929 hamutuk ho sira nia família Victor de Sousa ho nia namorada, Josefina ne’ebé kondus motór Honda Beat kór mutin xapa métriku 6584 fila hosi programa vizita peregrinasaun Santuáriu Nain Feto, Aitara, Soibada- Manatuto.
Vítima sira ho motór to’o iha área Akadiru-Laran, derrepente hetan soke hosi kotuk, ho karreta marka Hyundai Carrinha kór malahuk ho xapa matrikula 27-773 ne’ebé kondús hosi Suspeitu VX hosi Munisípiu Lautem.
Tuir kronolojia investigasaun ekipa Tango Alfa Tránzitu Munisípiu Dili hatudu katak, suspeitu VX lori karreta ho velosidade mai hosi diresaun Manatuto soke uluk vítima Victor de Sousa no Josefina nia motór hodi kontinua soke tutan matebian Joana ho nia namorada Thomas Aquino ho monu ba alkatraun leten karreta rasta ho metru 48 hodi rezulta matebian nian kondisaun fíziku tohar hotu.
Portavós Komandu Jerál PNTL, Superintendente Xefe, Arnaldo de Araújo, informa, hafoin soke tiha vítima na’in-haat, suspeitu halai ba entrega aan iha Komandu PNTL Cristo Rei hodi submete kedas ba investigasaun.
Nia dehan, asidente ne’e akontese, tanba fatór umanu no suspeitu VX kondús karreta ho velosidade.
“Asidente ne’e rezulta ita nia alin feto ida mate fatin, vítima ida kanek todan no na’in rua kanek kaman. Agora suspeitu ita detein ona iha sela polísia Caicoli, Dili” portavós PNTL, Arnaldo ba jornalista iha Komandu Jerál PNTL, Caicoli, Dili.
Mate isin Joana Francisca Gusmão nu’udar estudante iha Fakuldade Siénsia Polítika, Relasaun Internasionál. Autoridade polísia entrega ona mate isin ba Ospitál Nasionál Guido Valadares hodi halo autópsia no parte HNGV entrega ona ba família lori ona ba nia moris fatin, Laleia, Weboro, Suku Latularan.
Ekipa investigasaun Komandu PNTL Dili, ohin, fasilita mós parte família vítima inklui família hosi suspeitu hodi kontaktu malu buka rezolve problema ne’e.
Jornalista: Eugénio Pereira
Editór: Francisco Simões
