Arsebispu ba Arquidiocese Metropolitana Dili, Dom Virgílio do Carmo da Silva, . Imajen Tatoli/António Gonçalves

DILI, 26 outubru 2020 (TATOLI)—Arsebispu Arkedioseze Metropolitana Dili, Don Virgílio do Carmo da Silva SDB, iha domingu ne’e, inugura ona Jardín Orasaun Santo António Parókia Santa Terezina Meninu Jesus Bedois Becora ninian.

Iha ámbitu inagurasaun ne’e, Arsebispu ne’e mós fó sakramentu krisma ba krismandu hamutuk 300-resin.

Notísia Relevante :Monumentu Pe. João de Deus sai hanesan símbolu gratidaun hosi povu

”Ita sarani Dili iha tinan ida ne’e Dioseze Dili kompleta tinan 80 entaun iha eventu ida ne’e ita halibur hamutuk iha ne’e husi joven no bada’en sira halo fatin furak hanaran Jardín Orasaun Santo António ne’ebé ita inagura ona no sarani sira iha parókia ne’e simu mós sakramentu krisma hamutuk atus tolu resin,” Dom Virgílio hato’o ninia mensajen ne’e durante omília bainhira prezide misa domingu, horiseik.

Nia dehan orgullu no agradese ba inisiativa sarani no joven sira tanba hari’i ona jardínrefere hodi haburas liután fé sarani katólika no uma kreda iha Timor-Leste.

”Tanba fatin ne’e iha liu komunidade nia leet iha jardim ne’e Ilas Santo António ho altar kalise ne’e atu dehan katak fatin ohin ita halulik no hasantu bainhira sarani sira iha ne’e hasoru problema karik mai iha ne’e hakmatek hala’o orasaun tanba Ilas Santo António ninia sai hanesan sentru ba iha komunidade sira nian,” nia hateten.

Iha fatin hanesan Amu Paróku Santa Terezina do Menino Jesus Bedois, Albertino Franco Morano, agradese ba kontribuisaun sarani sira no ema hotu-hotu ne’ebé maka kontribui ona orsamentu no tékniku hori konstrui obra ne’e.

Nune’e mós Koordenadór Komisaun Organizadora konstrusaun Jardín Orasaun Santo António Bedois, José Pereira, relata obra ne’e hetan mós apoiu husi joven sira ne’ebé makadaudaun ne’e servisu hela iha Inglatera, Irlanda no Korea Súl ho montante $ 2.800-resin.

”Ami juventude sira tuur hamutuk iha momentu ne’ebá halo inisiativa atu hari’i Jardim Orasaun Santo António para sarani sira bele mai halo sira-nia orasaun iha Ilas Santo António nia hodi hato’o sira-nia problema no sira-nia terus, susar ne’ebé durante ne’e hasoru,” nia hateten.

Obra ne’e hetan mós tulun finanseira husi Eis Primeiru-Ministru Kayrala Xanana Gusmão, Loza Kreatif, Kompañia Montana Diak, Parókia Bedois rasik no seluk tan.

”Jardínne’e ami mesak juventude sira mak halo hahú husi fulan-agostu to’o agora bele ramata ohin halo inagurasaun husi Bispo Dioseze Dili tanba ne’e mak husu ba juvetude husi bairru sira seluk katak labele kria problema beibeik maibé hakbesik ba Nai Maromak atu nune’e bele banati tuir buat ne’ebé mak ami halo daudaun ne’e,” nia dehan.

Notísia Relevante :Don Basílio re-inaugura Igreja Parókia Santo António Baucau

Jornalista : Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here