Belarmino Constâncio Hornai

DILI, 24 outubru 2020 (TATOLI)–Youtuber  Timor-Leste komprometidu sei utiliza meius komunikasaun YouTube hodi promove lia-loos no kontribui kombate hoax ka lia-falsu iha rede sosiál.

Notísia Relevante : SEKOMS promove kampaíña kontra hoax no internet saudavel

Belarmino Constâncio Hornai, hateten, nu’udar Youtuber Timor-Leste sei utiliza meius YouTube hodi promove lia-loos.

“Nu’udár joven idade produtivu liuhosi média YouTube, ka hakarak sai youtuber tenke hanoin saida maka atu halo ba ha’u-nia nasaun atu kombate hoax iha sosiedade ida-ne’e,” hateten Berlarmino Constâncio Hornai, ba Agência Tatoli bainhira partisipa iha kampaíña nasionál kombate hoax iha Golgota Mall, Dili, sesta ne’e.

Kampaíña nasionál ne’e  inisia no promove  hosi Sekretáriu Estadu Komunikasaun Sosiál (SEKOMS).

Nia hateten, liuhosi mídia YouTube bele promove juventude sira-nia talentu iha videographer  no aproveita promove Timor iha mundu internasionál hosi produtu pozitivu sira ne’ebé mak hatama ba iha YouTube.

Nia dehan, ko’alia kona-ba hoax Timor-Leste mós agora  hasoru dezafiu boot ida tanba foin-sa’e sira agora barak maka aproveita uza hoax ne’e insulta malu haluha tiha devér joven nian ne’ebé loloos ne’e atu kontribui ba paz no dezenvolvimentu.

“Saida maka ita halo ba prevensaun ba hoax ne’e nu’udár joven idade produtivu bainhira uza média sosiál liuhosi YouTube, Facebook, Instagram no seluk tan, ita tenke define ita-nia aan saida maka ha’u atu halo hodi kontribui ba paz no dezenvolvimentu,” nia hateten.

Voluntária  : Arminda Fonseca

 Editór       : Fancisco Simões

HAKEREK NO HATÁN

Please enter your comment!
Please enter your name here