DILI, 24 outubru 2020 (TATOLI)-Ministru Transporte no Komunikasaun (MTK), José Agostinho da Silva, esklarese katak parte Ministériu Transporte no Komunikasaun, kansela vou Timoroan na’in-160 atu ba Reinu Unidu (UK/United Kingdom) ho aviaun komersiál Citilink tanba mosu fallansu iha komunikasaun.
“Durante pedidu Estadu Emerjénsia, hosi fevreiru-marsu to’o mai agora ne’e MTK através Autoridade Aviasaun Sivíl Timor-Leste (AACTL, sigla portugés) relist flight approval poor-volta 80-itál vou ne’e normál hela, mas agora vou ida ikus ne’e vou dala tolu, maka ha’u haree ninia koordenasaun ne’e ladún di’ak. Iha fali akontesimentu sira hanesan ne’e ninia problema ne’e iha ne’ebé, fukun ne’e iha ne’ebé falta iha koordenasaun,” Ministru José Agostinho da Silva, esklarese hodi responde Agência Tatoli via telefone sábadu ne’e.
Ministru José Agostinho da Silva hateten, bainhira mobiliza uluk ema sosa tiketi, maibé laiha komunikasaun ho autoridade kompetente sira depois maka hatama proposta hodi hatuur desizaun. Ida-ne’e, tuir Ministru José Agostinho, bele lori risku ba situasaun no ba Timoroan sira-nia vida.
“Ohin diretór no diretór jerál sira hosi Ministériu Negósiu Estranjeiru no Kooperasaun (MNEK), nune’e mós Ajénsia ida ne’ebé maka durante ne’e sira koordena no organiza ohin ne’e tenke sosa billete, mobiliza ema ba fali ba tiha aero portu maka impoin fali atu release fali flight ida ne’e la la’ós koordenasaun di’ak,” Ministru José Agostinho da Silva afirma tan.
José Agostinho hatutan, loloos koordenasaun di’ak lai, asegura uluk lai aviaun sira ne’e, bele ka lae, depois maka orienta ema para sosa tiketi no termina loron fiksu kona-ba bainhira mak tenke halo vou.
“Agora ida ne’e kontráriu. Mobiliza ema sosa tiketi, depois haruka ema ba tiha aero portu depois maka impoin para ita release flight approval entaun ita ladún iha koordenasaun,” José Agostinho tenik.
“Diretór sira mai ko’alia ona ho ha’u no ha’u orienta sira tenke buka solusaun imediata ba asuntu-ne’e. katak oinsá maka bele fó solusaun ida ne’ebé maka dignu ba ita nia sidadaun sira , presiza hadi’a depois koordena halo didi’ak para fasilita ita nia ema sira-ne’e karik sai ba rai li’ur sai ho di’ak, labele iha difikuldade. Ne’ebé ohin iha solusaun ba ida ne’e agora hein depende ba ajénsia ida ne’ebé maka organiza,” Ministru José Agostinho hateten.
Nia husu ba oin ajénsia fa’an tiketi aviaun ne’e tenke tau atensaun, koordena didi’ak depois maka orienta ona para sosa tiketi, mobiliza ema hodi hola tiketi no bai ha aero portu.
“Labele mobiliza uluk sosa tiketi, tau ita nian sidadaun sira risku, depois maka kria konfuzaun. Ba oin maka ne’e ohin ha’u hato’o ona ba Diretór sira Diretór Jerál hosi MNEK na’in-haat maka mai ha’u iha ne’e sira rekoñese erru, ba oin sira mós dehan ita koordena didi’ak buat sira hanesan ne’e labele akontese tanba durante ne’e la akontese, ita la’ós foin maka release flight approval ne’e,” Ministru José Agostinho tenik.
Tuir Governante ne’e katak, nia parte la autoriza vou ne’e tanba Timor-Leste sei iha situasaun estadu emerjénsia tanba ne’e tenke tetu didi’ak .
“Estadu Emerjénsia ne’ebé maka governu deside através Konsellu Ministru no Sua Exelénsia Prezidente Repúblika dekreta, maka parte hotu tenke asegura hosi lei ida ne’e,” nia afirma.
Nia dehan, durante periodu emerjénsia Timor-Leste la autoriza ka la fó autorizasaun ba komersiál flight. Se karik ida-ne’e hetan autorizasaun kontráriu ho espíritu estadu emerjénsia.
Tuir Ministru José Agostinho katak kuandu vou ohin maka hetan autorizasaun, saida maka akontese signifika dehan, aviaun sira ne’ebé maka durante ne’e opera mai Timor-Leste bele rekere sira-nia direitu.
Jornalista : Natalino Costa
Editór : Francisco Simões
