Ekipa Boavista FC Timor, susesu hetan terseiru lugar kopa FFTL, epoka ne’e, hafoin halakon Assalam FC ho golu 8-1. Imajen/Mídia FFTL

DILI, 24 outubru 2020 (TATOLI) – Ekipa Boavista FC Timor, susesu hetan terseiru lugar kopa Federasaun Futeból Timor – Leste (FFTL), epoka ne’e, hafoin halakon Assalam FC ho golu 8-1 liuhosi jogu final ne’ebé hala’o ohin loraik iha Estádiu Munisipál Dili.

Hosi rezultadu ne’e, Assalam obrigadu tenke okupa de’it iha pozisaun ikus liu ka kuatru lugar. Enkuantu primeiru lugar sei hadau malu entre duelu rua; Lalenok United FC no AD. SLB Laulara ne’ebé sei hasoru malu aban iha Estádiu Café Gleno.

Bainhira ekipa rua ne’e se mak manán nia mak iha direitu absoluta hodi sai hanesan primeiru lugar (kampiaun) hodi simu osan hamutuk $15,000,00, enkuantu segundu lugar iha direitu ba simu prémiu  osan ho valor $10,000,00.

Ekipa Boavista hanesan klube terseira lugar iha direitu ba prémiu osan ho valor $7, 500.00 no Assalam sei prémiu osan mós ho valor  $2,500.00.

Golu vitória Boavista hatama hosi Edit Savio iha minutu ’11, ’48, ’55, 73, Orcelio da Silva ’18, Nelson Viegas ’17, Boateng Apiah ’41, Oligario Boavida ’71 no golu úniku Assalam hatama hosi Hasan Ramos iha minutu ’45+2.

Jogu ne’e dirije hosi árbitru Efrasio da Silva, juiz liña Romario Teti, Paulo da Costa no árbitru rezerva Joviano Reis.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here