Timor Plaza. Imajen/foti hosi Google

DILI, 24 outubru 2020 (TATOLI)- Diretór Ezekutivu Sentru Dezenvolvimentu Inkluzivu Timor-Leste (CDITL, sigla portugés)  ho Asosiasaun Timor Furak, ohin, iha Timor Plaza,  organiza konsertu no feira artezanatu  ho objetivu atu fó oportunidade ba ema ho defisiénsia sira bele hetan asesibilidade envolve iha atividade públiku sira.

Diretór Ezekutiva CDITL, Martinho Guterres hateten, atividade konsertu no feira artezanatu ne’e atu halo promosaun ba maluk  defisiénsia sira ne’ebé iha CDITL nian.

“Atividade ida-ne’e hodi promove kriatividade no abilidade ba maluk sira ema ho defisiénsia sira rasik iha,” Martinho Guterres hateten hodi responde ba Agência Tatoli.

Nia haktuir, atividade ida-ne’e nia objetivu seluk maka oinsá atu buka angriasaun fundus ba CDITL hodi responde fila-fali ba nesesidade organizasaun nian.

Diretór Ezekutiva CDITL, Martinho Guterres, informa daudaun ne’e parte CDITL enfrenta hela minimu rekursu fasilidade, hanesan komputadór, meza, kadeira, no mós rekursu finanseiru rasik para responde ba planu no programa CDITL nian.

CIDTL rasik foin rejista iha fulan hirak liu seidauk iha ajénsia ruma atu apoiu fundu  no depois rejistu tiha parte CDITL hakarak duni kria atividade sira hanesan atu hetan fundus ruma.

Iha fatin hanesan Koordenadór Timor Furak, Olívio Abílio de Jesus hateten,  parte Timor Furak hakarak suporta CIDTL liuhosi atividade konsertu no promosaun artezanatu  atu  kria espasu ba ema defisiénsia sira ne’ebé hola  parte iha CDITL, hodi  asesu ba iha atividade públiku sira.

“Ami nu’udar grupu arte kultura, grupu foin-sa’e, ami hakarak hakuak ema hotu, liuliu ema ho defisiénsia  hodi fó espasu ba sira para sira mós sente oportunidade, sira bele espresa sira  nia talentu iha fatin hanesan Timor Plaza no  hafanu ema nia koñesimentu no konsiénsia katak, ema ho defisiénsia mós bele,” Olívio hateten.

Nia dehan,  hosi atividade ne’e nu’udar mós oportunidade atu halo angriasaun fundus hodi apoiu ba ema ho defisiénsia.

CIDTL nu’udar organizasaun ne’ebé envolve ema ho defisiénsia matan,  tilun no seluk tan no organizasaun  refere durante ne’e halo atividade artezanatu ho nia membru na’in-60 ne’ebé sira-nia ofísiu iha  Becora.

 Jornalista  : Natalino Costa

Editór         : Francisco Simões

HAKEREK NO HATÁN

Please enter your comment!
Please enter your name here