Plenária Parlamentu Nasionál. Imajen Tatoli/António Gonçalves

DILI, 23 outubru 2020 (TATOLI)—Parlamentu Nasionál (PN) sei debate ba estensaun Estadu Emerjénsia (EE) dahitu (7) iha semana oin atu deside no atu autoriza Prezidente Repúblika deklara Estadu Emerjénsia ba territóriu nasionál.

Notisia Relevante: Prezidente Repúblika dekreta ona estadu emerjénsia daneen

“Iha tersa, 27 outubru 2020 Parlamentu Nasionál liuhosi plenária sei diskute no aprova kona-ba prolongasaun pedidu autorizasaun estadu emerjénsia ba dahitu (7) tanba loron 03 novembru termina ona estensaun EE daneen (8) nian entaun sei presiza fó kontinuasaun fali hosi hahú 03 novembru to’o 03 dezembru 2020,” Sekretária Meza Parlamentu Nasionál, Deputada Lídia Norberta dos Santos Martins, informa liuhosi konferénsia imprensa iha Parlamentu Nasionál, sesta ne’e.

Portavós Parlamentu Nasionál ne’e haktuir,  horisehik líder bankada parlamentár sira deside ajenda estensaun EE dahitu halo antes nune’e bainhira termina EE daneen sei iha kontinuasaun kedas.

Bazeia ba despaixu Prezidente Parlamentu Nasionál, Deputadu Aniceto Longuinhos Guterres Lopes, delega Sekretária Meza Parlamentu Nasionál, Deputadu Lídia Norberta Soares Martins hanesan portavós hodi fó-sai atividade parlamentár nian.

Parlamentu Nasionál aprova estensaun Estadu Emerjénsia Daneen ho unanimidade hodi autoriza Prezidente Repúblika, Francisco Guterres “Lú Olo” dekreta Estadu Emerjensia iha loron 03 outubru 2020 liubá.

Entretantu Prezidente Repúblika, Francisco Guterres “Lú Olo” dekreta estensaun Estadu Emerjénsia Daneen hahú hosi 00.00 iha loron 5 outubru 2020 (segunda-feira) no termina iha oras 23.59 iha loron 3 novembru 2020 (2020) ba territóriu nasionál tomak, parsialmente suspende direitu balun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here