Sesaun plenária Parlamentu Nasionál. Imajen/TATOLI

DILI, 23 outubru 2020 (TATOLI)—Parlamentu Nasionál (PN) sei halo votu konfirmasaun liuhosi estraordinária kona-ba Lei Protesaun Sivíl ne’ebé Prezidente Repúblika Francisco Guterres “Lú Olo” veta.

Notisia Relevante: PN sei halo apresiasaun ba lei protesaun sivíl iha semana oin

“Iha loron kinta horisehik liuhosi reuniaun líder bankada deside sei realiza plenária estraordinária iha segunda, 26 outubru 2020 hodi halo fila-fali votu konfirmasaun kona-ba Lei Protesaun Sivíl, ne’ebé veta hosi Prezidente Repúblika, Francisco Guterres “Lú Olo,” Sekretária Meza Parlamentu Nasionál, Deputada Lídia Norberta dos Santos Martins, informa liuhosi konferénsia imprensa iha Parlamentu Nasionál, sesta ne’e.

Portavós Parlamentu Nasionál ne’e dehan iha solusaun rua mak tenke foti, ida konfirma no ida fali buka akomoda preokupasaun Prezidente Repúblika nian hodi halo ajustamentu ba proposta-lei ne’e.

“Maibé opsaun rua ne’e seidauk foti tanba ne’e mak iha segunda-feira (26/10/2020) sei halo apresiasaun ba lei protesaun sivíl ne’e,” nia dehan.

Parlamentu Nasionál (PN) aprova dekretu-lei númeru 16/V (2a)-Lei Protesaun Sivíl ne’e iha loron 21 jullu 2020 ho rezultadu votasaun a-favór 57, kontra 0 no abstensaun 4.

Maibé Prezidente Repúblika, Francisco Guterres “Lú Olo”, veta politikamente dekretu-lei Protesaun Sivíl tanba kestiona asuntu sira liga ba deklarasaun kalamidade públika no asepeitu iha restrisaun direitu, liberdade no garantia.

Prezidente Repúblika konsidera testu hosi dekretu-lei ne’e tenke pondera ho adekuada, loloos no di’ak no konsisténsia ho lei sira seluk. Xefe Estadu mós konsidera iha situasaun alerta, kontijénsia no kalamidade públika iha dekretu-lei ne’e la sufisiente.

Ho veta xefe Estadu nian, Prezidente Komisaun B (Negósiu Estranjeitu, Defeza no Seguransa), Deputadu Agustinho Siqueira “Somoxo“, hateten lei refere esbosa dezde 2010 maibé lori tempu naruk no 21 jullu 2020 mak foin aprova iha Parlamentu Nasionál.

“Prezidente Repúblika veta no haruka fila mai Parlamentu Nasionál no parlamentu atu halo saida, ne’e iha dalan-rua katak hadi’a lei ne’e ka halo votu konfirmasaun. Tuir ha’u-nia hanoin sei liuhosi dalan votu konfirmasaun hodi haruka fila-fali ba Repúblika,” Prezidente Komisaun B informa ba jornalista sira iha resintu Parlamentu Nasionál, sesta ne’e.

Nia esplika, Prezidente Repúblika nia razaun mak temi iha artigu 24 no artigu 25 iha Konstituisaun RDTL.

Nia hatutan, iha situasaun kalamidade públika maibé iha Lei Protesaun Sivíl ne’e labele foti kompeténsia artigu 25 iha Konstituisaun RDTL tanba artigu 25 ne’e dehan suspende ema-nia direitu no liberdade liuhosi deklarasaun estadu emerjénsia.

“Lei Protesaun Sivíl restrinje direitu no liberdade signifika hanesan parlamentu ne’e dehan labele tama, liuhosi sorin-sorin bele. Ida-ne’e mak bolu restrinje direitu no liberdade, signifika mós la suspende ema-nia direitu maibé restrinje de’it liberdade no direitu balu,“ Prezidente Komisaun B ne’e argumenta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here