DILI, 23 outubru 2020 (TATOLI) – Kompañia internasionál Shanghai Construction Group Co, Ltd (SCG) hosi Xina hahú halo ona servisu ba konstrusaun edifísiu foun Komandu Polísia Nasionál Timor-Leste (PNTL).
Kompañia ne’e foin hahú fila fali ninia atividade servisu, hafoin moras globál surtu COVID-19 ne’ebé akontese hahú Xina hodi halo servisu atu mobiliza ekipamentu hosi Xina mai Timor-Leste lao paradu, tanba portu no aeroportu taka hotu.
Atu haree servisu konstrusaun la’o tuir dezeñu Bill Of Quantity (BoQ), Komandante Jerál PNTL, Komisáriu Faustino da Costa no Segundu Komandante Jerál, Komisáriu Mateus Fernandes, foin lalais ne’e, konvida Vise Ministru Interiór, Antonio Armindo hodi halo obsesaun direita ba prosesu servisu iha Komandu Jerál PNTL, Caicoli, Dili.
Tuir observasaun Agência Tatoli nota, daudaun ne’e kompañia Estatál Xina ne’e hahú mobiliza ekipamentu pezadu hodi kee-rai inklui monta fasilidade servisu nian.
Futuru edifísiu foun PNTL ho andár-haat (4) kompleta ho fasilidade teknolojia modernu sei halo ho durante tinan-ida ho balun, konstrui hosi Kompañia Internasionál Shanghai Construction Group Co, Ltd (SCG) no Konsultan PT. Ciriajasa Cipta Mandiri in JV With JKC Konsultan Engineering Unipesoal Lda ho valór orsamentu Millaun $10,177,638.20.
Jornalista : Eugénio Pereira
Editór : Francisco Simões
Parabens