Kompañia hahú monta alkatraun iha área Baheda. Imajen/Mídia MOP

DILI, 23 outubru 2010 (TATOLI)Kompañia ne’ebé toma konta konstrusaun projetu estrada Hera-Manatuto, hahú monta ona alkatraun iha área Beheda, postu administrativu Lakló, munisípiu Manatuto.

“Ho nune’e to’o fulan-outubru ne’e ramata, konstrusaun estrada hosi Dili to’o Baucau uza hotu alkatraun,” haktuir nota imprensa ne’ebé Agência TATOLI asesu iha sesta ne’e.

Konstrusaun estrada nasionál pakote A01-01 Dili-Hera-Manatuto-Sta. 47+600 – Sta. 47+850 B/S daudaun ne’e atinje ona 98%.

Ministériu Obra Públika (MOP) garante katak serbisu kompañia sei konklui molok kontratu konstrusaun sivíl ramata iha loron 24 fevereiru 2021.

Relasiona ho konstrusaun ne’e, MOP husu públiku ne’ebé halo movimentu iha área konstrusaun, atu la’o ho kuidadu.

“Serbisu fasilidade estrada hanesan sinál tráfiku, markasaun ba estrada no seluk tan seidauk kompleta, ho nune’e nafatin husu ba públiku tomak liuliu motorizta sira atu halai kareta no motorizada ho neineik, kuidadu no atensaun nafatin bainhira halo viajen,” refere nota ne’e.

Nune’e mós, MOP apesia komponente liña frente sira hotu, hahú husi traballadór la kualifikadu no kualifikadu, enjiñeiru, nível jestór no kompañia responsável ba esforsu no serbisu maka’as hodi finaliza konstrusaun estrada nasionál ne’e.

Entretantu, finansiamentu projetu reabilitasaun estrada ne’e hosi Orsamentu Jerál Estadu (OJE) 2019 no mós fundu empréstimu hosi Governu Japaun liuhosi Ajénsia Kooperasaun Internasionál Japaun (JICA, sigla inglés).

Nune’e, obra reabilitasaun fahe ba trosu rua, hosi Dili ba Manatuto no iha ponte Lakló (Manatuto) ho nia distánsia kilómetru 48,74.

Empreza ne’ebé kaer obra ne’e mak Sinohydro Corporation Limited husi Xina ho totál kuatu millaun $48,87.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here