Diretór Verifikasaun no Lisensa Liga Futeból Timor - Leste (LFTL), José Carvalho. Imajen Tatoli/Dok

DILI, 23 outubru 2020 (TATOLI) – Diretór Verifikasaun no Lisensa Liga Futeból Timor – Leste (LFTL), José Carvalho hateten, jogu tasa 12 de Novembru tama iha kalendáriu fiksu liga nian. Tanba ne’e, jogu refere hanesan jogu obrigatóriu ida ba klube hotu ne’ebé hamahan iha LFTL tenke partisipa.

Notísia Relevante : LFTL loke ona rejistrasaun ba Tasa 12 de Novembru

Nia dehan, bainhira klube balu mosu ho razaun oioin hodi la partisipa mak órgaun liga sei la tolera no sei fó sansaun rigorozu hasoru klube sira-ne’e.

“Klube ne’ebé mak la partisipa iha jogu tasa 12 de Novembru sei hetan sansaun tuir regra ne’ebé mak hakerek iha estatuta Liga Futeból Timor – Leste nian,” José Carvalho hateten liuhosi konferénsia imprensa, ohin, iha sede LFTL, Formosa, Dili.

Antes ne’e LFTL anunsia ona ba públika hodi loke rejistrasaun ba klube hamutuk 20 iha LFTL atu submete dokumentu no hatama lista jogadór hahú hosi loron 5 to’o loron 20 outubru, maibé LFTL deside atu rejistrasaun prolonga tan to’o loron 30 outubru ne’e.

“Ami prolonga tan tempu mak klube sira balu la mai rejistu entaun ami konsidera nia la mai partisipa, maibé nia boikota programa ne’ebé mak liga atu implementa. Entaun sansaun sei todan ba sira. Ho nune’e, ami enkoraja nafatin klube hotu atu mai foti formuláriu iha sede liga nian,” nia dehan.

Nia informa, daudaun ne’e klube hamutuk 11 mak foti ona formuláriu rejistrasaun nian no klube ida mak submete ona lista jogadór. Klube ne’e mak Lalenok United FC.

Data fiksu ba dada rifa ba jogu tasa 12 de Novembru sei hala’o iha loron 7 novembru mai ne’e.

Iha parte seluk, klube ne’ebé iha direitu absoluta atu partisipa iha tasa 12 de Novembru loloos 19 de’it tanba iha époka 2019 klube estimadu hosi munisipiu Manatuto, Atletico Ultramar halo boikota iha kampu laran bainhira kontra Lalenok United FC. Iha ne’ebé jogu hala’o ba faze oitavu finál iha Estádiu Munisipál Dili.

Momentu ne’ebá órgaun liga foti kedan medida no sansaun disiplinár hodi fó ba klube ne’e atu laiha direitu partisipa jogu tasa 12 Novembru durante tinan rua, ho nune’e Ultramar sei partisipa fali jogu tasa 12 iha 2022.

Jornalista   : Hortencio Sanchez

Editór         : Francisco Simões

HAKEREK NO HATÁN

Please enter your comment!
Please enter your name here