Komandante Polísia Munisípiu Aileu, Superintendente Jorge Monteiro. Imajen Tatoli/Eugénio Pereira

DILI, 23 outubru 2020 (TATOLI) – Primu-irmaun, hosi feton nia ko’us no na’an nia ko’us iha Aldeia Sarin, Suku Mantane, Postu Administrativu Aileu Vila, Munisípiu Aileu, hatudu “isin-besi, ran-manas” ba malu hodi lori katana taa-malu tanba de’it rai pedasuk balun.

Tuir kronolojia ne’ebé aprezenta ba iha Polísia Munisípiu Aileu, kazu ne’e akontese iha domingu (19/10), iha ne’ebé suspeitu ho inisiál LF  haksesuk malu ho vítima JA, ikus mai suspeitu ho nervozu lori katana taa  vítima nia isin lolon, tanba disputa rai hela fatin.

Komandante Polísia Munisipiu Aileu, Superintendente Jorge Monteiro, informa ba Agência Tatoli via telefone katak, komandu Polísia Munisípiu Aileu aprezenta ona kazu ne’e ba Ministériu Públiku.

Tentativa omisídiu ne’ebé halo hosi suspeitu LF ne’e rezulta vítima JA nia kondisaun fíziku kanek grave no parte PNTL ho família sira halo kedas atuasaun hodi lori vítima mai Ospitál Nasionál Guido Valadares (HNGV) Dili no detein mós suspeitu hodi halo investigasaun.

“Semana ne’e ita rejista kazu tentativa omisídiu ida, entre maun-alin na’in-rua ne’ebé sira hanesan família de’it maka halo problema ba malu tanba hadau malu rai hela fatin no toos fatin ne’ebé problema kleur ona la hetan solusaun ikus mai mosu problema halo suspeitu LF lori kro’at hakanek tiha vítima JA,” hateten Jorge Monteiro.

Jorge Monteiro dehan, kazu ne’e Ministériu Públiku aprezenta ona ba Tribunál hodi prosesa tuir lei no vítima hala’o hela tratamentu saúde iha Ospitál Nasionál Guido Valadares (HNGV), Dili.

Nia hatutan, atu hakotu problema ne’e, parte PNTL hamutuk ho autoridade lokál sira husu atu parte família rua rezolve tuir dalan legál aprezenta kazu ne’e ba Tribunál hodi bolu parte Ministériu Justisa liuhosi Diresaun Nasionál Terras no Propriedade (DNTP) buka solusaun tuir lei.

Iha parte seluk, Komandante Jorge dehan, PNTL Aileu mós simu ona orientasaun hosi Komandante Jerál PNTL, Komisáriu Faustino da Costa, hodi halo operasaun maka’as durante loron finadu hodi evita asidente tráfegu no konfrontu entre grupu juventude.

PNTL Aileu liuhosi Seksaun Tránzitu mós kontinua halo operasaun ba transporte públiku sira ne’ebé halo movimentu ba mai la iha dokumentu no viola regra tránzitu nian sei halo apreensaun hodi infratór sira bele selu multa ba estadu tuir lei.

 Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here