Primeiru-Ministru, Taur Matan Ruak, prezide reuniaun Konsellu Ministru estraordinária, iha Palásiu Governu, sesta (23/10). Imajen Tatoli/Egas Cristovão

DILI, 23 outubru 2020 (TATOLI)–Governu liuhosi reuniaun Konsellu Ministru estraordinária, aprova ona ho alterasaun projetu dekretu Governu ne’ebé aprezenta hosi Ministra Finansa ein ezersísiu, Sara Lobo Brites, kona-ba regra ezekusaun Orsamentu Jerál Estadu (OJE) ba 2020.

Ministru Prezidénsia Konsellu Ministru, Fidelis Manuel Leite Magalhães, informa regra ba orsamentu tinan ne’e diferente oituan ho tinan antes ne’e.

“Dekretu ne’e sempre estabelese kada tinan bainhira orsamentu aprova, maibé tinan ne’e muda oituan ninia estrutura no iha dekretu ezekusaun diferente oituan tanba loke dalan ba membru Governu sira delega kompeténsia ba Diretór Jerál (DG, sigla portugés) ou entidade ekiparadu ho ida ne’ebé responsável ba administrasaun no finansa iha liña ministeriál nia laran atu asina kontratu no Commitment Payment Voucher (CPV),” relata Ministru Fidelis hafoin ramata reuniaun ezekutivu sira iha Palásiu Governu, sesta ne’e.

Notísia Relevante: Prezidente Repúblika promulga lei OJE 2020

Dekretu Governu ne’e hateten, bele halo delegasaun ba entidade ne’ebé mensiona ho montante osan másimu $500.000.

Portavóz ezekutivu dehan, ho dekretu foun bele loke dalan halo metin liután opsaun ba membru Governu sira atubele delega kompeténsia iha jestaun administrativa di’ak liután iha ministériu sira.

Diploma ne’e mensiona mós regra sira kona-ba ezekusaun OJE 2020, ne’ebé hetan aprovasaun hosi lei númeru 10/2020, loron 19 outubru, ne’ebé aplika orsamentu ba órgaun no servisu administrasaun sentrál inklui Rejiaun Administrativa Espesiál Oé-cusse Ambeno (RAEOA) no seguransa sosiál.

Regra hirak ne’ebé hatuur iha diploma ho objetivu atu regula no fasilita ezekusaun orsamentu iha fulan hirak ikus tinan ida ne’e.

Maioria hosi norma hatuur ona iha OJE 2019 no uza filafali iha dekretu Governu, maibé ninia redasaun halo simples liután no hadi’a organizasaun atu fasilita intrepretasaun responsável finansa sira iha setór públiku administrativu.

“Liuliu halo klarifikasaun kona-ba prosesu realizasaun despeza, ho identifikasaun ne’ebé klaru ba faze oioin atubele halakon dúvida inklui inísiu prosedimentu aprovizionamentu sira ou aseitasaun kompromisu hosi natureza plurianuál,” governante ne’e esplika.

Ho aprovasaun OJE 2020 maka Governu hakotu utilizasaun Dotasaun Orsamentu Temporáriu (DOT) ne’ebé hahú aplika iha fulan janeiru to’o outubru tanba Proposta Lei OJE 2020 la pasa.

Nune’e ezekusaun efetivu ba orsamentu tinan fiskál 2020 hahú iha fulan novembru to’o dezembru 2020.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here