Koordenadór GASC, Filipe da Costa, foto hamutuk ho ekipa CVTL. Imajen/Espesiál

MANUFAHI, 23 outubru 2020 (TATOLI)- Gabinete Apoiu Sosiedade Sivíl (GASC) halo fiskalizasaun ba filiál Cruz Vermella Timor-Leste (CVTL) Munisípiu Aileu no Manufahi, atu haree implementasaun fundu ne’ebé kada tinan apoiu ba CVTL.

Notísia Relevante : Voluntariu CVTL apoiu sensibiliza informasaun kona-ba prevensaun dengue

Koordenadór GASC, Filipe da Costa hateten, objetivu hosi fiskalizasaun tanba Cruz Vermella Timor-Leste (CVTL) sai parseiru di’ak ho Gabinete Apoiu Sosiedade Civil (GASC) ne’ebé hola parte iha programa Governu atu hala’o no lori dezenvolvimentu besik liután ba povu.

“Ami halo fiskalizasaun ba munisípiu rua-ne’e tanba iha ha’u-nia mandatu, kada-tinan hahú iha 2019, CVTL hetan fundu hosi GASC ho montante $250,000,00 hare ba kanalizasaun bee-moos, saneamentu ba komunidade iha  munisípiu rua-ne’e atu eleva povu-nia moris di’ak no hamenus númeru iha índise Ki’ak Multi-dimensional ne’ebé Timor-Leste iha porsentu 41,8. Tanba ne’e, ha’u vizita hodi haree diretamente funsionamentu no habelar programa CVTL nian iha futuru,” Filipe da Costa hateten ba Agência TATOLI iha salaun Filiál CVTL, Manufahi, kinta ne’e.

Razaun vizita Filiál CVTL iha munisípiu rua-ne’e ho objetivu prinsipál rua maka, dahuluk atu observa direita benefísiu fundu ne’ebé GASC apoiu ba CVTL ne’ebé uza ba kustu operasionál no aloka ba programa esensiál sira, tanba programa CVTL konsidera hanesan programa cross-cutting, nune’e GASC foti programa ne’e atu sai programa esensiál mós. Daruak, GASC hakarak hato’o pilár estratéjiku ba 2021 hodi CVTL bele dezeña programa tuir pilár ne’e.

Koordenadór GASC ne’e, dehan, iha vizita ne’e filiál CVTL iha munisípiu rua-ne’e hasoru dezafiu lubuk ida durante iha sira-nia ezisténsia, hanesan menus fasilidade, rekursu umanu, no partisipasaun voluntáriu atu halo programa CVTL nian hakbesik ba komunidade, maibé oinsá sira bele jere dezafiu ne’e sai oportunidade.

“GASC prontu atu apoiu, no sira rasik maka serbisu maka’as atu modelu dezenvolvimentu ida ne’ebé di’ak hodi fó benefísiu direta ba komunidade,” Filipe da Costa hateten.

Nia dehan Timor-Leste agora sai membru ba Movimentu Estimulante Nutrisaun (SUN Movement), tanba ne’e, tenke serbisu maka’as atu ema hotu iha direitu báziku  asesu ba ai-han no nutrisaun ne’ebé di’ak, tanba ne’e, CVTL hahú promove ona direitu báziku hodi sai ezemplár ba organizasaun sira seluk.

Iha fiskalizasaun ne’e demografia filiál CVTL Munisípiu Aileu, iha problema lubuk ida ne’ebé maka hanesan liu-liu demografia má-nutrisaun, no kiak, tanba ne’e sujere ba CVTL presiza hala’o estudu-ida tan kona-ba moras hada’et tuberkuloze (TB), nune’e bainhira atu hatama proposta ba GASC, bele diskute fundus bazeia ba rezultadu estudu no estratéjia eliminasaun tuberkuloze tantu iha Munisípiu Aileu no seluk tan.

Pontu Fokál Polítika ba SUN Movement rekomenda atu CVTL filiál hotu iha munisípiu kolabora di’ak ho Sekretariadu Nasionál atu dezeña hamutuk programa dezenvolvimentu ida-di’ak ba povu.

GASC haree atividade filiál CVTL munisípiu rua-ne’e  hatudu katak iha tinan 2018-2019, sira hala’o kanaliza bee-moos ba komunidade, no CVTL mós fornese treinamentu sokorru ba foin-sa’e sira hodi rezolve imediata karik problema dezastre ruma mosu iha komunidade-nia leet, no treinamentu ba prevensaun HIV-SIDA.

Durante situasaun COVID-19,  CVTL envolve voluntáriu sira atu hala’o sosializasaun surtu COVID-19 ba komunidade oinsá sira bele hatene hodi hala’o prevensaun sedu hamutuk ho parseiru sira seluk.

CVTL hetan rekoñesimentu husi Governu Timor-Leste liuhosi Dekretu-Lei Nu. 6/2005, 14 setembru, iha ámbitu ba misaun asisténsia no ausiliár Governu hodi hala’o sira-nia funsaun nu’udar organizasaun naun-lukrativu hodi hala’o sira-nia atividade iha territóriu tomak.

Koordenadór Filiál CVTL Manufahi, Adelino Caldeira, hato’o agradese ba Prezensa GASC tanba  durante GASC nia apoiu bele ajuda sira hodi hadi’a sira-nia  hakat ona to’o sira-nia fatin hosi haree difikuldade saida maka sira hasoru.

“Ami agradese ba GASC tanba antes seidauk mai vizita ami-nia fatin iha tinan 2019 fó ona apoiu ba ami hadi’a ami-nia edifísiu  hodi tau sasán, tanba antes ne’e sasán ami tau de’it iha kontentór laran halo sasán aat hotu,” nia esplika.

Pilar estratéjiku GASC  2021

GASC iha pilár estratéjiku tolu atu utiliza fundu iha 2021 maka, dahuluk, harii sosiedade sivíl   ho instituisaun-ida forte, ne’ebé identifika Sosiedade Sivíl ho klasifikadu, iha enkuadramentu legál ne’ebé estruturadu, organizadu atu hatene papél forum, rede membru (NGO ) sira, no ativu iha sosiedade atu responde nesesidade no asaun fó impaktu direita ba komunidade.

Tuirmai (daruak), Sosiedade sivíl tenke iha papél forte atu halo advokasia ba mudansa públika no re-formasaun polítika no sosiál, edukasaun publika, kontrolu no balansu ne’ebé haree ba impaktu pozitivu bainhira implementa programa estadu, no parseria ho Governu atu implementa programa presiza sosiedade sivíl mai ho planu estratéjia, ezekusaun, avaliasaun, jestaun rekursu no finanseira di’ak, atu iha regulamentu ruma hodi kontrola funsionamentu organizasaun.

Ikusliu (datoluk), sosiedade sivíl tenke kontribui ba Sosiedade Timor-ida haksolok, inklui hasa’e rendimentu uma-kain, hadi’ak nutrisaun no inseguransa ai-han, haforsa direitu umanu, demokrasia, restaurasaun ambiente, promosaun kultura, turizmu, no promosaun talentu juventude feto no mane.

Voluntária : Arminda Fonseca

Editór       : Francisco Simões

 

HAKEREK NO HATÁN

Please enter your comment!
Please enter your name here