Xefe Estadu Maiór Jenerál F-FDTL, Majór Jenerál Lere Anan Timur hala’o promosaun diviza ba Saudozu Kapitaun Fragata, João Francisco de Fatima “Buka Tuir” ba Postu Capitão-de-mar-e-Guerra, durante serimónia despedida iha Komandu Jenerál F-FDTL, Fatuhada, Dili. Imajen Tatoli/Eugénio Pereira

DILI, 23 outubru 2020 (TATOLI)- Komandu Jenerál FALINTIL-Forsa Defeza Timor-Leste (F-FDTL), ohin, ofisiálmente fó valorizasaun ikus hodi hala’o promosaun diviza ba Saudozu Kapitaun Fragata João Francisco de Fatima “Buka Tuir” ba Postu Capitão-de-mar-e-Guerra.

Notísia Relevante : Komandu F-FDTL “lutu” lakon kuadru superiór João “Buka Tuir”

Promosaun ne’e hala’o direita hosi Xefe Estadu Maiór Jenerál F-FDTL, Majór Jenerál Lere Anan Timur, akompaña hosi komandante sira no família durante serimónia presta omenajen ikus ba Saudozu iha Kuartél Jenerál F-FDTL, Fatuhada Dili.

Promosaun diviza ne’e hala’o tuir despaxu númeru 003/CEMG-F-FDTL/2020 por distinsaun ba Postu Capitão-de-mar-e-Guerra ba saudozu NIM 012501, João Francisco de Fatima “Buka Tuir” bazeia ba alínea 2 e 7 do artigu 68 do dekretu lei númeru 33/2020 de 2 de setembru.

Iha estatutu F-FDTL kontempla katak, promosaun hosi dalan distinsaun sai nu’udar prémiu ida, tanba virtude exepsionál no kapasidade komanda diresaun ka xefe ne’ebé militár ne’e hatudu iha kompañia ka iha asaun sira ne’ebé kontribui ba Gloria a Patria ka Prestíjiu Instituisaun Militár.

Majór Jenerál Lere Anan Timur dehan, tuir estatutu militár alínea 7 mós hatete, militár ne’ebé hetan promosaun hosi dalan distinsaun liu dala ida no promosaun ne’e bele akontese depois nia mate.

“Promosaun ne’e halo hodi valoriza saudozu ninia kontribuisaun ba Instituisaun F-FDTL ne’ebé nia dedika durante funu to’o nia mate, tanba ne’e nia mate ho Postu Kapitaun Fragata promove ba Postu Capitão-de-mar-e-Guerra,” Lere hateten liuhosi diskursu.

Lere dehan, saudozu ninia kontribuisaun iha prosesu luta ba Timor-Leste nia independénsia maka’as tebes no saudozu mós nu’udar ema matenek ida kontribui idea barak iha prosesu konstrusaun Instituisaun F-FDTL.

“João fó nia kontribuisaun maka’as tebetebes ba ita nia luta. Nia mós sempre fó nia idea ba instituisaun la’o ba oin, tanba ne’e biar sira ne’e mate ona, ita rekoñese nafatin sira nia esforsu no sira nia kontribuisaun,” Jeneral Lere Anan Timur hateten.

Magnífiku Reitór UNPAZ, Adolmando Amaral ho estrutura entrega diploma graduasaun ba oan mane boot, Saudozu , Capitão-de-mar-e-Guerra João Francisco de Fatima “Buka Tuir”, iha Komandu Jenerál F-FDTL, Fatuhada, Dili. Imajen Tatoli/Eugénio Pereira

Iha tempu no fatin hanesan, Magnífiku Reitór Universidade da Paz (UNPAZ) Adolmando Amaral, hateten, sira-nia parte triste tebes tanba lakon mós estudante di’ak hanesan Saudozu “Buka Tuir” nu’udar estudante ida hosi Programa Estudu Mestradu de Direitu.

Haree ba matebian ninia valór no prestasaun estudu ho rezultadu di’ak. Nune’e, (UNPAZ) liuhosi despaxu Reitór númeru 102/Reitór UNPAZ/X/2020, hala’o mós graduasaun ba Saudozu ba Lisensiadu em Direitu e Mestradu em Direito.

Matebian rasik hala’o ona judisium iha loron 22 fevereiru 2020 ho valor 88,6 ho kategoria valór A koñesidu hanesan exelente.

Tuir observasaun Agência Tatoli nota, Vise Xefe Estadu Maiór Jenerál  F-FDTL, Brigadeiru Jenerál Falur Rate Laek, ne’ebé hanesan mós  maun boot saudozu, triste no tanis bainhira asiste  serimónia despedida ikus iha Komandu F-FDTL.

Hafoin presta omenajen, Komandu F-FDTL hamutuk ho família sira lori kedas mate isin ba matebian nia moris fatin iha Loi-Huno, Postu Administrativu Osú, Munisípiu Viqueque, hodi hala’o serimónia rituál.

Hosi Osú, família no parente sira sei lori hikas  saudozu mai hala’o serimónia funerál iha Jardin Eroi Metinaro, Dili, sábadu (24/10).

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here