Aserbispu ba arkedioseze metropolitana Dili, Don Virgílio do Carmo da Silva. Imajen Tatoli/António Gonçalves

DILI, 22 outubru 2020 (TATOLI)- Bispu Dioseze Dili, Mgr. Virgílio do Carmo da Silva, SDB, husu ba família boot Komandu FALINTIL-Forsa Defeza Timor-Leste F-(FDTL) atu kaer metin prinsípiu São Miguel Arcanjo ne’ebé sai mahein ba instituisaun F-FDTL hodi satan povu no nasaun hosi ameasa oin-oin.

Notísia Relevante : Komandu F-FDTL “lutu” lakon kuadru superiór João “Buka Tuir”

Aserbispu ba arkedioseze metropolitana Dili (Archebispo da Arquidiocese de Dili), Mgr. Virgílio do Carmo da Silva hato’o mensajen ne’e bainhira hamutuk ho Padre Kapelaun F-FDTL, Tanente Rui Gomes hamutuk ho Ministru Defeza, Filomeno da Paixão de Jesus, Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál, Lere Anan Timur  ho komandante sira selebra misa agradesimentu ba loron São Miguel Arcanjo iha Kuartél Jenerál F-FDTL, Fatuhada, Dili, ohin.

Don Virgílio dehan, selebrasaun misa ne’ebé halibur forsa liman kro’at Estadu no povu nu’udar ema sarani fiar nain tenke hato’o agradesimentu hodi hala’o knaar iha instituisaun F-FDTL bele hatudu ninia domin hala’o servisu garante seguransa bele la’o susesu.

Nia dehan, ohin loron mundu tomak sofre hasoru propagasaun surtu COVID-19, maibé Igreja Katólika sempre hamutuk ho sarani halo orasaun ba Nai Maromak atu tulun saúde povu tomak iha mundu bele livre hosi ameasa COVID-19.

“COVID-19 sai obstákulu ba movimentu no atividade relijioza, maibé ho haraik aan ita tuku-tuur harohan Maromak nafatin haraik saúde ba ema hotu, matenek ba nai ulun sira, atu hatene buka meius bele  halo prevensaun pandemia ida ne’e au-mézmu tempu hanesan konvite ida atu la haree de’it ba ema ida nia aan, maibé haburas fali ema hotu nia solidariedade ho maun-alin sira iha mundu ba hirak ne’ebé mate bele hetan rahun di’ak hosi Nai Maromak ba sira nia klamar,” Don Virgílio hateten iha nia omilia.

Bispu ne’e dehan, importante liu iha mundu ema hotu-hotu tenke reza maka’as atu salva ema idak-idak nia vida iha situasaun perigu ida ne’e.

Bispu hatutan, Amu Papa Francisco rasik hasai ona mensajen ba sarani tomak iha mundu atu kuidadu aan hodi kumpre nafatin regra saúde nian hodi bele prevene aan hosi COVID-19 nu’udar moras aat ne’ebé fó lembra fila fali ba São Miguel Arcanjo iha vida moris funu hasoru satanás sira.

Nia hatutan, forsa organiza aan nafatin hamutuk ho kreda ne’ebé la’o iha rai katak, kreda militante, kreda plasenta, no kreda  ne’ebé iha mundu purgatóriu purifikasaun ho hirak ne’e haksolok ona iha Maromak nia futar oin nune’e mós ho Anju Arcanjo sira hotu.

São Miguel Arcanjo  maka Maromak nia mensajeiru, ema ua’in presiza tau iha neon, tanba festa ida ne’e la’ós festa foun, maibé festa antigu ida ne’ebé hahú kedas ona, depois  Nai Jesus Kristu, maibé kadavés komemora loron São Miguel Arcanjo nian festa sai oportunidade ida ba ema hotu atu hamnasa hafoun sira nia deseju atu la’o iha dalan Maromak nian.

“Dalaruma sai ameasa ba instituisaun nia di’ak, hahalok satanás nian ne’ebé hosik hela mundu, maibé nafatin ho fiar ne’ebé iha ita bele hala’o atividade sira ho di’ak nafatin ba futuru,” nia hateten.

Iha fatin hanesan, Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál, Lere Anan Timur dehan, misa ne’e kada tinan sira halo hodi hanoin nafatin São Miguel Arcanjo nia hanorin nu’udar mahein ba forsa sira.

Komandante Lere dehan, ohin loron funu laiha ona, agora daudaun FALINTIL kaer metin ninia filozofia “FALINTIL mak Ikan Povu maka Bee” katak, FALINTIL tenke próteze nafatin povu no nasaun hosi ameasa hotu- hotu.

Tuir observasaun Agência Tatoli nota, misa selebrasaun ne’e hetan partisipasaun másimu hosi membru governu no komandante no membru F-FDTL sira.

Jornalista   : Eugénio Pereira

Editór        : Francisco Simões

 

 

HAKEREK NO HATÁN

Please enter your comment!
Please enter your name here