Ministru Turizmu, Komérsiu no Indústria, José Lucas do Carmo da Silva, akompaña hosi Vise-Ministra Turizmu, Komunitária no Kulturál no Diretora Maria Ernestina, haree produtu ai-han lokál iha feira lorokraik iha Jardín BJ Habibie, Bidau Santana, sesta (23/10). Imajen/Mídia MTKI

DILI, 23 outubru 2020 (TATOLI)—Iha ámbitu komemorasaun loron Proklamasaun Independénsia Timor-Leste ba dala-45 iha 28 novembru, Ministériu Turizmu, Komérsiu no Indústria (MTKI) liuhosi Diresaun Nasionál Empreendimentu Aktividade no Produtu Turístiku (DNEAPT) realiza atividade feira lorokraik durante loron rua hahú sesta (23/10) to’o sábadu (24/10), hodi promove produtu lokál.

Iha abertura eventu ne’e, Ministru Turizmu, Komérsiu no Indústria, José Lucas do Carmo da Silva, hateten ministériu iha planu realiza tan atividade hanesan no tama ona iha programa ministériu hodi fó oportunidade ba negosiante hala’o atividade negósiu.

“Ohin ha’u la’o haleu haree produtu sira no simu mensajen hosi maluk negosiante sira ne’ebé husu Governu atu kontinua atividade hanesan. Tanba ne’e ha’u konsidera no ba tinan 2021 ita hanoin atu halo eventu hanesan kada fulan, nune’e maski iha situasaun COVID-19 maibé ita bele fó espasu ba inan feton sira fa’an produtu lokál. Ida-ne’e ita iha ona programa,” Ministru José Lucas informa hafoin halo abertura feira lorokraik iha Jardín B.J Habibie, Bidau Santana, sesta ne’e.

Notísia Relevante: Aban, MTKI realiza feira iha jardín Habibie promove produtu gastronomia

Governante ne’e dehan, feira ne’e hanesan atividade regulár ne’ebé MTKI organiza,  nu’udar kontinuidade hosi programa Governu anteriór.

“Eventu regulár ne’e hodi halo promosaun ba artezenatu no kulináriaria, lori hotu mai iha ne’e atu idaidak hatudu ninia produtu,” nia realsa.

Eventu ne’e nu’udar parte ida hosi rekuperasaun ekonómika hodi normaliza hikas atividade ekonómika rai-laran.

“Ita hakarak hahú fila ba normál, tanba ne’e neneik ita hahú no ba oin bainhira pandemia ne’e la’o normál, ita aumenta frekuénsia atividade nu’udar pakote estímulu turizmu,” nia akresenta.

Iha fatin hanesan, Diretora Empreendimentu Aktividade no Produtu Turístiku MTKI, Maria Ernestina Lopes, informa partisipante iha eventu ne’e hosi restaurante hamutuk 30 no negosiante balun ne’ebé promove mós produtu lokál.

“Restaurante sira maka partisipa maibé iha komunidade balun maka hakarak tuir feira hotu, ita labele taka dalan ba sira,” nia akresenta.

Sorin seluk, Negosiante tais Timór, Helena de Jesus, apresia ho inisiativa MTKI tanba bele organiza eventu ne’e hodi nia bele partisipa fa’an tais no husu atividade ne’e bele iha kontinuidade.

“Ha’u husu Governu se bele realiza atividade hanesan ne’e iha fulan ida dala rua ho durasaun tempu kleur oituan, nune’e bele kontinua promove tais Timór nafatin no nia valór labele lakon,” hateten Helena.

Feira ne’e hetan partisipasaun másimu hosi komunidade sira no iha divertimentu hosi artista timor-oan sira.

Jornalista: Natalino Costa  

Editora: Julia Chatarina

HAKEREK NO HATÁN

Please enter your comment!
Please enter your name here