Korpu Dosente Universidade da Paz (UNPAZ) na’in-62 kompleta sira nia kursu pedagojia faze formasaun Eskolár durante semana-rua iha Sentru Formasaun Polísia (CFP). Imajen/PNTL

DILI, 22 outubru 2020 (TATOLI)—Universidade da Paz (UNPAZ) tuir planu iha fulan-novembru sei haruka tan dosente hamutuk ema na’in 30 bá tuir formasaun kona-ba pedagojia ka siénsia hanorin nian iha Sentru Formasaun Polisia Comoro (CFP-sigla portugés) Dili, durante semana.

Iha inisiu fulan-outubru 2020, Korpu Dosente Universidade da Paz (UNPAZ) na’in-62 kompleta sira-nia kursu pedagojia faze formasaun eskolár durante semana rua iha Sentru Formasaun Polísia no sei kontinua pratika durante fulan-tolu (3) iha UNPAZ.

Notísia Relevante :Korpu dosente UNPAZ na’in-62 kompleta kursu pedagojia

Magnífiku Reitór UNPAZ Adolmando Amaral, hateten kursu ne’e realiza bazeia ba rekomendasaun painél internasionál ne’ebé Ajénsia Nasionál ba Avaliasaun no Akreditasaun Akadémika (ANAAA) atu hadi’a kualidade edukasaun ba manorin na’in sira iha ensinu superiór sira iha Timor-Leste.

“Rekomendasaun ANAAA nian ne’e mak ita haruka ona dosente 62 tuir ona formasaun pedagojia ba etapa dahuluk no termina ona iha semana liu ba no etapa daruak depois finandu mak ita sei haruka tan dosente na’in 30 ba tuir tan formasaun pedagojia fatin iha Sentru Formasaun Polisia Comoro,” Adolmando dehan ba Tatoli via telefone, kinta ne’e.

“Bazeia ba rekomendasaun ANAAA nian ha’u hateten ba dosente sira maske ita iha ona nivel akadémiku mestradu ka dotoramentu maibé ita labele kontente di’ak liu ita buka atu estuda tan hodi kapasita ita nia an,” nia hateten.

Formadór ba programa formasaun pedagojia ne’e maihosi péritu Polisia Nasionál Timor-Leste Sentru Formasaun Comoro Dili.

UNPAZ iha dosente hamutuk 178, na’in 62 tuir ona formasaun pedagojia no 115 maka sei tuir iha faze tuir mai.

Entretantu, hafoin formasaun klase durante semana rua sei kontinua pratika durante fulan-tolu (3) no Instrutór sira sei akompaña dosente sira oinsá prepara manuál, planu lisaun, planu sesaun, métodu hanorin no oinsá avalia papel bainhira métodu hirak ne’ebé maka instrutór hanorin sira kompleta no hadi’a di’ak hotu ona sira avalia no halo ezame iha sira-nia universidade.

Notísia Relevante :CFP realiza formasaun pedagojia ba dosente UNPAZ

Jornalista :Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here