Vítima SSJ ne’ebé hetan agresaun fízika hosi inan hakiak. Imajen Tatoli/Natalino Costa

DILI, 22 outubru 2020 (TATOLI)Labarik tinan hitu ho inisiál SSJ hetan agresaun fízika hosi inan hakiak to’o kanek grave.

Vítima fó sasin, durante ne’e nia sempre hetan baku maibé la konsege fó hatene ba entidade relevante, to’o ikus viziñu sira maka hato’o ba Polísia.

“Ama baku ha’u ho mangeira no besi to’o ha’u kanek iha kanotak,” labarik menoridade ne’e tenik ba Agência TATOLI iha Eskuadra Becora, kinta ne’e.

Ho agresaun fízika ne’ebé nia inan hakiak halo hasoru nia, daudaun vítima la tama eskola kuaze fulan ida ona.

Iha sorin seluk, inan hakiak hosi SSJ, Apolónia de Jesus, hateten ninia aktu hanesan inan ida atu hanorin nia oan.

“Hanesan inan ida, ha’u atu eduka nia tanba labarik ne’e iha uma ko’alia la rona, tanba ne’e ha’u baku no bainhira ha’u hirus baku ho mangeira maibé momentu ne’e ha’u mós la sadar lori besi kiik ne’ebé iha ha’u-nia oin hodi baku nia, derepente ha’u mós bilan tiha,” nia haktuir.

Nia dehan, informasaun ne’e to’o sai iha públiku tanba viziñu sira maka ba hato’o keixa.

Kona-ba vítima la tama eskola, Apolónia rejeita atu fó komentáriu.

Entretantu, kazu ne’e akontese iha aldeia Kakeu Laran, suku Becora no hafoin akontesimentu Polísia Eskuadra Becora asegura SSJ hodi hetan asisténsia no lori ona ba uma mahon.

Enkuantu, entidade relevante halo ona identifikasaun ba vítima nia inan hakiak no submete ona ba investigasaun.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here