Sekretáriu Estadu Arte no Kultura, Teófilo Caldas. Imajen Tatoli/António Gonçalves

DILI, 22 outubru 2020 (TATOLI)–Sekretaria Estadu Arte no Kultura, Teófilo Caldas, hasoru malu ho Primeiru-Ministru (PM), Taur Matan Ruak, hodi atualiza serbisu hanesan dezenvolve patrimóniu arquitetóniku no atividade ne’ebé bele kontribui ba rekuperasaun ekonómika.

“Papél SEAK iha rekuperasaun ekonómika maka halo investimentu ba partimóniu arquitetóniku orijen portugés hanesan biblioteka, sentru kulturál, muzeu nasionál, dezenvolve fatin turizmu kulturál, eis prizaun Aipelu iha munisípiu Liquiçá, eis rezidénsia administradór sira no seluk tan,” Sekretáriu Estadu Teófilo relata hafoin ramata sorumutuk ho Xefe Governu iha Palásiu Governu, kinta ne’e.

Nia konsidera fatin istóriku bele atrai turizta no hatama rendimentu, tanba ne’e presiza investimentu hodi bele kontribui ba rekuperasaun ekonómika.

Aleinde ne’e, iha enkontru ne’e governante ne’e simu orientasaun hosi PM, liga ho serbisu SEAK no atualiza mós preparasaun orsamentu tinan fiskál 2021 hosi Sekretaria Estadu ne’e molok halo diskusaun iha Parlamentu Nasionál.

Daudaun ne’e SEAK partisipa hela ba festivál kulturál ne’ebé organiza hosi Gabinete Prezidente Repúblika no sei kolabora iha komemorasaun 28 novembru (Loron Proklamasaun Independénsia) ne’ebé tuir planu sei realiza iha munisípiu Liquiçá.

Nune’e mós, enkontru ne’e ko’alia mós kona-ba Loron Kulturál Nasionál ne’ebé mak sei realiza iha munisípiu Lautém.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here